法拉利聯乘Liquid mini專色
法拉利跑車是不少男士們的Dream Car，奈何每部起碼盛惠300多萬元，對普羅大眾來說簡直是天方夜譚！想擁有一部法拉利跑車未必要買模型車仔，皆因Acer最新推出手機Liquid mini Ferrari Edition，機殼用上法拉利專利的紅色，機背更有大大個廠徽，遠睇已經夠晒搶眼；最正係連鈴聲都可以變埋「隆隆」的引擎聲，今趟$3,998就可以擁有「超跑」法拉利！
Acer作為法拉利Formula 1車隊的贊助商，聯乘推出產品已非首次，例如筆記簿電腦Ferrari 1000、5000就有Details位又夠型仔，推出後大受歡迎！而今次推出的Liquid mini Ferrari Edition則是手機聯乘的第二炮，比之前推出的Liquid E更加輕巧和的骰。
專利紅色 招牌背殼
提起法拉利，不能不提是令人神往的紅色車身。貴為Ferrari Edition，Liquid mini亦由原本的彩色機殼改用專利的Rosso Corsa法拉利紅機殼，顏色鮮艷搶眼，十足十跑車焗漆，效果突出！而且機背中央位置同樣有盾形的法拉利廠徽突顯身分，拎上手零舍虛榮！話明叫Liquid mini，機身體積亦相對縮水，3.2吋屏幕比iPhone 4S仲要細一個碼，配合機頂及機底的弧形設計，相當好揸手，女士們都應該啱用。
跑車元素 引擎鈴聲
跑車最引人注目的就是「隆隆」的引擎聲，隨時隔幾條街都聽得到，對車迷就尤其有吸引力。Liquid mini為求「演繹神髓」，特別加入多款法拉利專屬鈴聲，包括Ferrari Heart Beat、Ferrari Rise等等，將強勁節奏的音樂與法拉利招牌引擎聲Remix，其他手機絕對搵唔到，夠晒獨一無二！當然，手機已內置多款法拉利跑車的Wallpaper以及短片，好讓各位車迷過足癮！值得一提，功能表的底色特意換上紅色，加上部分的資料夾亦加入法拉利Logo，風格統一！
$3,998
備有三頁鎖機頁面，可以擺放不同Widgets。
備有多款自家Widgets，靚仔又實用！
預載招牌的Social Jogger，整合Facebook、Twitter、Plurk、Flickr等社交程式。
內置多個法拉利Wallpaper，拉利迷實鍾意。
特設法拉利鈴聲，Remix效果唔錯！
採用上拉式功能表，都算方便。
Status Bar加入多樣新功能，包括快速設定、響鬧時鐘等等，相當好用。
記憶卡支援熱插拔，唔使熄機就可以換卡，方便過相、過歌。
雖然機身有成13mm厚，不過其弧邊設計拎上手都幾舒服。
500萬像素鏡頭質素一般，而且冇LED燈，夜晚就比較難Snap。
隨機附送法拉利特別版藍芽耳機，同樣紅色加搶眼Logo，揸車用就最型仔！
機底備有microUSB插口，可用作充電及接駁電腦。
喇叭設於機底，不過播歌都幾響。
機身採用3.2吋屏幕，細緻度不俗。
機背採用弧形設計，配合大大個法拉利廠徽，虛榮到爆！