靠蛛絲馬迹 考腦筋玩甩身

好多消閒Apps都設定成狂篤或亂搖一餐，務求令你在「忙碌中」過日辰。如果你已厭倦了這種唔使經大腦的玩法，不妨試吓不少「有腦」之士都愛玩的Escape Game（逃脫遊戲）。這類遊戲大都要考你的觀察力和推理能力，要你達成不同的條件，才可走得甩！

《車內逃脫》　實景更投入

此App最大特色就是要逃離狹小的車廂。故事假設你被人扑暈了，醒來發現自己處身一輛反鎖的汽車內，四周漆黑一片，要你想辦法逃出。傳統的逃脫遊戲一般對遊戲畫面要求不高，但這App就破格以全實景拍攝車廂內大大小小的細節，除了考你夠唔夠細心找出逃走的方法外，相信亦能幫你了解車廂結構呢！

下載費用：免費

《App Navi》　逃脫大特集

逃脫遊戲的缺點在於耐玩性不高，成功逃脫後基本上已無再玩的意欲，所以玩家需不斷尋找新的逃脫Apps繼續挑戰自己。而這個《App Navi》就是不斷發布新逃脫Apps的集中地，不時會提供新款的逃脫遊戲供玩家即時下載試玩。如果你是這類遊戲的粉絲，就絕不能錯過了。

下載費用：免費

《無聊的男人》　想走冇咁易

英文名是Escape Game "An Uninspired Man"，主角係Office上班族，有日要拿文件畀某人，突然房間的門全部鎖上，只好想辦法走人。此App的畫面非常簡單，不過解迷的細節就一點都不馬虎，如果少動點腦筋，就成身工具都唔知點用。好在整個遊戲以全中文顯示，玩家睇得明畫面內的各式小提示。

下載費用：免費

《喪屍圍城》　突圍考應變

此喪屍App之目的都係要逃出生天，不過場景就唔係狹小空間，而係整個城市咁大。你要成功闖過七個城市才能唔使畀喪屍圍。喺白天，你要盡力搜羅武器；到夜晚，就要聯同其他生還者合力與喪屍開戰。比起考觀察力，這個App好似考應變能力多啲。

下載費用：US$2.99

《Super Ball Escape》　碌波逃走

這個App特別之處，就係你要控制一粒機械球，透過G-sensor操控滾動，仲要避過所有監視器和陷阱，最終才可安然「碌」出基地。要逃離的場景有時都幾複雜，更設有不同門鎖、巡邏機械人等等路障，就算你眼明，但不夠手快，都隨時要從頭再「逃」過。

下載費用：免費