《Call of Duty: Modern Warfare 3》王者再臨打唔停手

臨近年尾，遊戲大作紛紛出爐，最新面世就有王牌射擊遊戲《Call of Duty: Modern Warfare 3》。唔少討論區都有玩家問，到底揀早兩星期推出的《Battlefield 3》抑或呢隻今日發售的《Call of Duty: Modern Warfare 3》好，因為兩者風格類似，主題接近，而且推出時間又前後腳。計我話，有閒錢又有時間，不如買晒兩隻啦！《COD: MW3》今集再強化線上對線模式，新增多種玩法，而且又改善了獎勵系統，連線打仗真係打到停唔到手！

俄軍攻打全世界

此Game係《Call of Duty》系列的第八套遊戲，從遊戲副題都睇得出，今集打現代戰爭。故事延續《COD: MW2》，亦同樣由開發《COD: Modern Warfare》系列的Infinity Ward操刀。《COD: MW2》講玩家扮演的美國Delta Force同英軍SAS特種部隊成員搞掂Shepherd後，在印度休養生息時畀俄國極端分子Makarov偷襲，而且Makarov軍隊亦大舉在全世界搞破壞，主角們又要再上戰場，由印度打起，打到巴黎、柏林、紐約、倫敦等世界各大城市，基本上全屬城市戰，在高樓大廈的城市間互相狂轟。

Survival Mode愈打愈喪

《Battlefield 3》賣點係用上全新Frostbite 2遊戲引擎，物理表現勁到震；而《COD: MW3》雖無特別轉換遊戲引擎，但畫面表現一樣超強，尤其以E3時上台Demo的一幕，由在水底潛行炸爆敵方潛艇，再上水同軍艦駁火，場面緊湊刺激，即使喺高速移動下，仍保持極出色的畫面顯示；所以話，兩隻遊戲真係好難取捨。今集亦特別加入多種好玩的遊戲模式，如在單機Special Ops中就新增Survival Mode，玩法介乎《Call of Duty: Black Ops》喪屍模式同《Gears of War》的Horde Mode之間，每一波來襲嘅敵人愈變愈強，而且敵人出現位置更會因應玩家狀態而變化，即係話愈嚟愈難打，要保得住條命仔之餘，仲要拚命搶錢升級裝備，愈打愈激。

改善平衡度減少屈機

有部分專業玩家玩射擊遊戲時，都會跳過故事模式直接上網連線對戰，這亦表示線上對戰模式係射擊遊戲最重要元素。今集《COD: MW3》線上模式就搞了很多新花招，除玩到熟的Deathmatch、Domination同Headquarters外，仲加入殺人後要搶到敵人軍牌先至算數的Kill Confirmed；又有好似喪屍咬人傳染咁，將殺死的敵軍加入自己陣營幫手殺敵的Infection；以及每殺一個對手後就會升級槍械的Gun Game模式等，玩極都有新鮮感。此外，對戰時的獎勵系統更得到強化，今集將Killstreak分為Assault、Support同Specialist三類，儲到連殺Killstreak後可以因應環境運用攻擊類、支援類的工具，亦可以儲到槍械的附加裝置Perks，可以提升槍械的瞄準穩定性及減低後座力。不過今集開發小組就刻意減低強大火力的Perks，想玩家可以活用唔同Perks戰鬥，調整後的平衡度令玩家更講求戰術運用，少咗屈機情況。

info

類型：射擊

開發：Infinity Ward/Activison

平台：Xbox 360、PS3

推出日期：今天

售價：$399

查詢：2359 7998

專用眼鏡套裝

雖然《COD: MW3》係一隻War Game，但其實唔使大家拎支槍去射BB彈。咁何解遊戲會出連眼鏡的特別版套裝？事緣廠方Activision錫住玩家，驚大家玩到廢寢忘餐兼眼矇矇，特別同眼鏡品牌Gunnar Optiks合作推出限量版遊戲眼鏡。眼鏡用上Carl Zeiss專業鏡片配輕量化鎂合金鏡架設計，煞食之處係可以睇畫面睇得更清楚，更仔細，可減低眩光，雙眼唔易攰，之前在外國試玩會反應都幾好，但就唔太啱「四眼」玩家。

售價：$998（遊戲連Gunnar專用眼鏡）