《闇三國Online》 魏、蜀、吳 魔獸戰
網遊《魔獸世界》咁受歡迎，全因其DotA對戰模式夠過癮。最近由Gameone代理的《闇三國Online》，就依循魔獸對戰模式而設計，三國鼎立結合人神魔三角亂鬥的設定，使一眾魏、蜀、吳武將變成神將魔帥，配合埋出名的三國戰役地圖及魔獸式的多人攻防戰，相信定能勾起魔獸迷的情意結。
20人對陣激戰
何謂魔獸DotA對戰模式呢？簡單來說，就是在一個廣大的版圖內，兩個陣營的玩家分別要守護自己的基地及摧毀對方的基地，而玩家只能控制陣營內的一位武將進攻。這玩法正好發揮了三國多武將的優點，有近百位武將可供選用，除了1Vs1、3Vs3、5Vs5的對戰玩法外，更有20人同時參與的10 Vs 10地圖。可以咁多人一齊線上圍毆，仲可以一邊打一邊買道具增強實力去屈人機，絕對滿足到一班勁愛對戰嘅玩家。
魔化經典戰役
遊戲人設非常有《魔獸》Feel，而建築物亦帶點西化味道。至於武將主要分成魏、蜀、吳和中立四個勢力，其中魏被設定成由魔族曹操父子帶領，而蜀就是人族，吳就是神族。將三國包裝成神人魔亂鬥算係幾新鮮嘅噱頭。遊戲還提供了經典戰役闖關模式：黃巾之亂、官渡之戰、赤壁之戰等出名戰役會化成一個大地圖關卡，你可以控制一位武將與其他玩家一齊闖關。敵方雖然只係A.I.大將，不過Boss全都係魔化了的首領，一啲都唔易對付。
廣東話陪你玩
好多知名遊戲唔係歐美就係日本推出，遊戲配音多以英語或日語為主。今次《闇三國Online》喺港澳台三地公測，於是特登採用廣東話和國語雙聲道語音，玩家可自行選擇啱聽Channel，同聲同氣，咁就玩得分外親切啦！
INFO
類型：MMORPG
開發：杭州電魂
代理：Gameone
推出日期：11月9日公測
售價：免費
網址：http://dota.gameone.com
想避免蠱惑的敵將瀕死前迅速逃走，就要出大範圍絕招打死佢。
周瑜、呂布、諸葛亮等角色設定非常「魔獸」化，衣飾甚為中西混合。
設有對戰等候室，想找唔同對手過招話咁易。
殺敵賺回來的金錢，可即時用於戰場上購買裝備，提升實力。
被砍殺的敵方武將，過一段時間後會喺大本營復活，想勝利就要盡快摧毀對方的大本營，唔畀佢翻生。
四個勢力共有近百位武將可選用，而且各自有不同的絕技。
所有武將都有專屬卡牌，用該武將玩闖關模式可幫卡片升呢，變相提升武將實力。
電腦控制的Boss雖然冇其他玩家咁「精明」，但大大份又多血，非常難打。
