做足原廠保養 LEAF更襟玩

無論出於環保或慳家需要，本港愈嚟愈多車主轉用標榜零耗油、零排放嘅電動車，當中嘅熱賣型號包括日產（Nissan）LEAF，雖然優點突出，但係動力配套與傳統汽車大不同，冇引擎，唔使換偈油、火嘴及油隔等損耗品，咁定期Check車有何搞作？今次就等熟晒結構嘅原廠LEAF專業技術員話你知，點樣去保養電動車及延長電池壽命，將LEAF嘅特性發揮到極點啦！　

原來電動車嘅保養比傳統汽油引擎私家車便宜，原因係慳咗唔少損耗品嘅「料錢」，撇除動力系統，其餘部分嘅保養工夫分別不大，都係檢查傳動、制動、轉向及電器系統，至於電動車獨有嘅電力系統，當然係必Check項目。LEAF嘅技術員阿龍表示，只要將LEAF連接至原廠嘅檢測電腦，就可即時診斷全車48組鋰電池嘅狀況，包括溫度及Volt數；如果發現任何一組電池讀數異常，都可作出針對性維修，以及更換零件。至於最受關注嘅電池壽命，根據廠方資料，如果做足維修、保養，使用五年後都只係減少10%左右，以LEAF嘅最大續航力160km為例，即係仲有144km，都算唔錯吧！

慢叉八成最長壽

LEAF可以使用「快叉」或「慢叉」充電機，快叉可以喺30分鐘完成80%充電，慢叉就可叉足100，不過過程需長達八小時。阿龍建議想延長電池壽命嘅話，最好用慢叉，而且唔好次次都叉滿，大概八成就可以，阿龍仲有以下提醒：「雖然LEAF嘅原廠電池已經好耐用，不過唔好彩遇到損壞嘅話，千祈唔好自行維修，因為電動車涉及高壓電力，維修要按既定程序，有關人員仲要穿上絕緣裝備以策安全，所以車主唔好冒險自己整呀！另一方面，由於電池用咗特別裝置保護，水浸過轆都唔會整濕，所以用電腦洗車機都冇問題，各位車主毋須擔心。」

半年一次Body Check

檢測電腦時，唔只可以診斷LEAF嘅本身狀況，原來平日嘅充電方式及駕駛習慣都會一併記錄落嚟，進行保養及維修後，車主仲會收到一份評估報告，技術員會以此為據，針對唔同人嘅用車習慣提出改善建議，幫手延長電池壽命。一般嚟講，車主可自行檢查嘅地方實在唔多，最多只係Check吓迫力油、電池水、水唧水及胎壓等，代理就建議每六個月或行駛5,000km後，就要返廠做定期保養，若果跟足原廠建議，其實LEAF每年嘅保養費用只需$4,360（以行駛少於10,000km計算），比Tiida嘅$8,720足足平一半，連埋慳咗嘅油錢及牌費，計落真係幫輕唔少。

查詢：2262 1088、2803 5333（合誠汽車）