無飯夫婦找到媽媽飯堂

認識好多「無飯」夫婦，罷煮理由充分：返工已經好辛苦，收工只想抖抖，食餐安樂茶飯。大坑新開業的食店「谷媽媽小店」，相信可以成為大家的「飯堂」，只因愛下廚的Blogger夫婦Herbert、文迪試完都讚，推介自製餃子、排骨菜飯有Home Feel。翹埋雙手，就可以食到「屋企」飯，你話幾好呢？

不是「無飯」，但同樣恩愛的夫婦Herbert、文迪經常下廚：「都是煮些簡單小菜，好似蒸排骨、蒸肉餅、苦瓜肉絲炒蛋等，出街食好肥膩，自己煮可以清淡些。」當然，兩小口都會趁特別日子食餐好，去高級餐廳撐枱腳，亦愛四出試新餐廳，像這開業不久的「谷媽媽小店」。

「谷媽媽」名字親切，原來是指「小甜谷」店主谷祖琳的媽媽。囡囡開甜品店，媽媽的店子則主打鹹食，餐牌簡簡單單，分成餃子、前菜、麵食等類別，還有每日推介，有魚有菜都算齊全。谷爸爸是山東人，這裏就標榜正宗山東餃子，而谷媽媽是台灣人，所以亦供應鹽酥雞，大部分食物都是自家出品，唯獨甜品全由小甜谷提供。特別一提，店子逢星期三休息。

Round 1食物質素

谷媽媽沙律 $36

Herbert：我怕食酸咪咪的東西，但都覺得個沙律不錯，味道合格有餘。

文　 迪：沙律有薯仔、甘筍及雜果等，好香蛋味及沙律醬味，似小時候屋企整的沙律，有親切感。

文：7分

H：6分

鮮蝦青瓜豬肉水餃 $20（半份4隻）

Herbert：用料新鮮，而且味道幾夾；只以清水烚煮，可食到原汁原味。

文　 迪：配搭特別，食落好清新，餃子皮煙韌，而且煮得不太乾身，放一陣再食都沒問題。

文：8分

H：8分

台式鹽酥雞　$38

Herbert：炸得外脆內嫩，細細件易入口；正宗台灣做法會好重味，這個版本輕怡些，更好食。

文　 迪：平日少食油膩食物，但這菜式做到不太油膩，件件乾身，味道幾好。

文：7分

H：8分

上海排骨菜飯（午市特價飯）　$48

Herbert：最鍾意呢道菜，連肥肉都炸得好香口，火候剛好唔油膩，鎖住肉汁唔乾身。

文　 迪：肉質嫩滑，夠Juicy，切成一件件方便食；飯內菜粒分量多，幾健康。

文：8分

H：9分

Round 2 環境

Herbert：簡潔舒服，座位不多唔會逼。

文　 迪：舖頭幾光猛，落地玻璃感覺開揚，環境乾淨企理。

文：7分

H：7分

Round 3 服務

Herbert：店員對餐牌認識足夠，講解得好詳細，仲介紹埋是日推介。

文　 迪：店員笑容夠，斟茶收枱勤快。

文：9分

H：8分

小記試食

熏黃金蛋 $20/2隻 8分

溏心蛋黃部分軟綿綿，味道亦不錯。

煎封銀魚 $88 6分

賣相不太好，魚肉較實淨，鮮味差一點點，有待改善。

網上食評達人Info

綽　　　號：Herbert（花名黑洞、雪糕怪）

寫Blog年資：7年

嗜　　　好：聽音樂、睇舞台劇、演唱會、電影

網　　　址：herbertlui.blogspot.com/

綽　　　號：文迪（花名黑太）

寫Blog年資：7年

嗜　　　好：煮食、睇烹飪節目及烹飪書、聽音樂、睇舞台劇及電影

網　　址：openrice.com/restaurant/userinfo.htm?userid=27195

試食檔案

店舖：谷媽媽小店

地址：大坑安庶庇街14號地下

日期：2011年10月15日

電話：2881 8869

總評：可以當屋企開飯！

Herbert B+

家庭式餃子做得好，餡料特別，如鮮蝦青瓜豬肉、鮮魚韮菜豬肉，惟選擇較少，人多幫襯一次已經試晒，期待有新餃子登場；排骨好出色，難怪店員大力推介。食物價錢相宜，餃子更有分全份、半份，幾適合兩口子食飯。

文迪 B

整體食物質素好，有家常味道。希望陸續有新元素，吸引大家經常幫襯，特別想試谷媽媽親手做的甜品。