人狗齊開餐開心滿麵

好多人當狗狗係仔女、老友記，錫到燶！平日帶愛犬出街散步容易，一搵地方開餐就難，以豬骨湯拉麵響朵的達磨，竟然造福各狗主，只因其銅鑼灣新店設有露天位置，狗狗跟埋去都得，兼有狗仔麵套餐醫肚，狗仔有得食，做主人咪可以少份擔心囉！

自去年於大坑開業，這拉麵店一直人氣高企，近日再開新店，令今年的拉麵「瘋」潮持續。新店比總店寬敞，地點更就腳，還增設拉麵吧位，旁邊有模仿Pop Art風格的達磨圖案作裝飾，夠「瀛」格！

狗仔食 無添加素麵

本想滿足拉麵迷，卻意外令狗主們受惠，點解？因為老闆之一的Annie都係狗主！她說：「平日同狗狗出街，一搵地方醫肚就頭痛。有次個熟客想帶埋狗仔嚟，我就招呼佢哋坐露天位，見主人同寵物都咁開心，咪索性做埋狗仔生意，推出狗仔麵套餐，可以各有各食。」這狗狗餐一出，反應奇佳，Annie表示這區附近有好多狗主，星期六、日最爆場，訂定位就無甩拖。

「露天區只得8個位，為顧及衞生、噪音問題，餐廳同一時間最多招呼兩隻狗仔，我哋會經常清潔，保持環境乾淨。」Annie補充說。狗仔套餐有素麵及昆布清水，看似平凡，實則花上不少心機。像素麵以百分百日本白麵粉製造，沒防腐劑、鹼水、人造色素及香料，保存期只得3日，確保新鮮，主人可放心畀狗仔食。至於清水更經過4重納米過濾，純淨度高，並加了點昆布作調味。

主人歎 特濃豬骨湯

眼見愛犬食得開心，做主人都放心大啖食，來這裏，當然不能錯過特濃豬骨湯底，用上雞骨雞腳豬骨，加入20多種蔬菜及醬汁，熬製最少10小時而成，湯頭濃稠漿口，面層更泛起薄薄的一層油，證明足料，夾起一箸麵會掛着湯汁，入口特別滋味。湯底只簡單分純豚骨味、醬油及辣味，將豬骨湯底作膽，再加入日本製醬油及辣醬作調味，風味絕佳。

湯底麵條有特色，配料亦不失禮。基本配料是雞蛋、木耳、紫菜等，柯打較矜貴的一品系列，更有埋明太子，味道豐富，若數到最愛，非煮得鬆化入味的豚角煮莫屬，選用荷蘭豬腩肉，肥瘦相間好油潤。不妨多點一、兩款小食試試，新登場的有南瓜餅，外脆內軟，南瓜餡滿溢，其餘招牌熱選則有日式芝士年糕、自家製五目飯團等。

查詢：2565 6001