on.cc 東方互動主頁

加大碼PSP Sony Tablet S

一如Netbook，Sony在Tablet產品開發上也給人姍姍來遲的感覺；但換轉另一個角度睇，Sony以靜制動亦高招，一出就針對同級產品不足之處，研製一部無論在設計、功能以至操作上都屬頂級的平板電腦。今次行貨先推出的Sony Tablet S，機身既符合人體工學，更預載Android 3.2操作系統，可連動家庭影音器材，兼且係首部獲PlayStation認可的Tablet，可用上9.4吋高清畫面玩PS遊戲，足可打低其他Android Tablet！

突破機身設計夠實用

市面上Tablet多不勝數，可是大部分面目模糊，幾難分得出唔同型號之間的差別。Sony的Tablet S雖然仍係採用傳統一塊大屏幕設計，亦只配備9.4吋1,280×800高清解像顯示，但從側面看，就會發現Tablet S跟其他產品的差別。Tablet S用上不對稱機背設計，宣傳片交代其設計理念來自將紙張屈曲；機身設計亦合乎人體工學，長時間手持都覺舒適，而598g機身亦實在唔算重。將Tablet S平放在枱面時，這微微彎曲的設計亦提供適當傾斜度，利用畫面上的虛擬鍵盤打字更舒服，其他Android Tablet真係做唔到。

兼容影音器材操作

Sony Tablet S採用最新版本Android 3.2操作系統，這方面已較不少對手出色，而且介面設計以至應用程式支援方面，Sony都有份參與，用家除了可以在Android Market下載各款Apps外，Sony更特別設置Select App網站，加入為Sony Tablet獨家開發的應用程式；不過，暫時就未見有新程式發布，到Tablet S正式推出市場時應有對應新Apps。除影音播放、影相等娛樂用途外，Sony Tablet S亦能夠全面對應影音產品，其中最好玩係可透過「Throw」功能，將在Tablet上播放的影片或相片用手指一拉，傳到支援DLNA的高清電視播放，或將音樂拉到兼容的無線音響系統上播放，方便又好玩。最估唔到係同時內置紅外線功能，可以當作遙控，控制埋家中其他影音產品！

PS認證買舊Game

雖然Android Market上已有相當多遊戲可供下載，但都唔似由細陪你玩到大嘅PS遊戲咁親切。Sony Tablet S就係第一部獲PlayStation認證的平板電腦，可以上網買番大量PS遊戲玩。早一星期前已有貴價日版Tablet S到港，當時內置《全民高爾夫2》同《Pinball Heroes》兩款免費遊戲，但到港版時就轉成《Pinball Heroes》搭《古惑狼》（《Crash Bandicoot》）。《Pinball Heroes》採用HD畫面製作，可直接用手指在畫面上拉彈珠槓；至於《古惑狼》就會在畫面上顯示出虛擬方向鍵加功能鍵，操作同以前玩PS無分別，但始終遊戲年代都幾久遠，畫質仍是多邊形，但免費Game嚟講都可收貨。

先出Wi-Fi版配大量配件

一如Sony以往慣例，出新機都有大量官方配件可供選擇，今次Sony為Tablet S推出插座、LCD屏幕保護貼、USB線、變壓器、藍芽鍵盤、輕便皮套同真皮機套等多款配件，由即日到10月19日期間預訂更有約8至9折的優惠；其中插座最實用，將Tablet S放落插座即可啟動電子時鐘或變身數碼相架顯示相片幻燈片。香港Sony先會推出Tablet S Wi-Fi版，至於Tablet S 3G版甚至係可摺埋的Tablet P就要遲一步先會推出，但今年內都未必可以成事。