on.cc 東方互動主頁

Nokia 701 NFC技術資料傳送最醒目

聽到「啪！」一聲，咪以為Model喺度畀錢搭巴士，查實佢透過Nokia新機701，喺尖沙咀換取「啪你有賞」着數優惠，無論扮靚、飲食、旅遊都能一啪攞着數！點解可以做得到？全因701擁有NFC技術來互通資料，而新機屏幕亮度更高達1,000nits，堪稱Nokia中最光，戶外使用最清係佢！

Nokia近年積極推廣NFC近距離傳輸技術（Near Field Communication），目前全球NFC手機已逾1,000萬部，預計五年後更會增至4.5億部，潛力無限！而由Nokia開發的Symbian Belle系統，亮點之一就是加入NFC配對功能，今次701便正正是當中最高階型號。

兩部機可連線對打

Nokia 701的NFC用法非常簡單，只要開啟NFC模式，再在其他NFC裝置上啪一下，即能自動進行配對，然後相互傳輸相片或聯絡人資料，甚至可讓兩部手機連線對打，比舊式紅外線或藍芽方便得多。最近Nokia更推出「啪你有賞」推廣活動，只要由即日起至11月11日期間，前往尖沙咀清真寺對出巴士站、銅鑼灣港鐵站A出口或旺角港鐵站內E出口，用手機啪一啪巨型Nokia海報的「NFC」圖示，即可免費獲得潮流資訊及着數優惠，當中分為秋冬服飾、旅遊指南、扮靚貼士、男士護膚、風水教學、食譜推介、戀愛秘笈及美食情報共八大主題，內容每周更新，保證緊貼生活！

屏幕明亮更勝一籌

說到手機設計，Nokia 701卻有點「舊瓶新酒」，皆因它帶着濃厚的C7影子，同樣是鵝蛋外形、渾圓機角配不銹鋼物料，但就換上一個亮度達1,000nits的IPS-LCD顯示屏，數值比500nits的AMOLED，或700nits的LG NOVA屏幕都要高，意味日照下仍有足夠亮度顯示內容；加上內建了ClearBlack技術，黑位更突出，戶外睇芒都唔使瞇埋雙眼咁辛苦！其他規格方面，它支援雜音消除技術，令通話更清晰；另外又備有800萬像素連雙LED閃光燈、720p高清拍片、8GB內置記憶體、藍芽3.0及802.11n等，又新又全面；其厚度亦只有11mm左右，女士拎上手都不覺累贅。

系統大幅度改進

Nokia 701另一賣點是改用全新的Symbian Belle系統，各方面都比舊有Anna系統大幅改進，例如主畫面由三個增至六個，畀用戶放多啲Apps捷徑；而每一版又可設定獨立桌面，方便為Apps分類。現在Widgets也不再是長條形設計，改而提供五種不同面積大小，用戶可按需要自由排列，介面自然更加個人化。另外，不知是否向Android取經，Belle終於增加下拉式選單，可在同一頁面管理行動數據、無線網絡、藍芽及聲音等設定，並同時查閱最新的往來訊息，比以前要逐層Menu進入更為人性化。不得不提的還有瀏覽器支援Flash Lite，無論睇ontv定網絡動畫都好自在！