山口War Machine 重裝三連射
玩玩具最怕做「後追一族」，即係捱炒價追番絕版貨，那種恨得牙癢癢嘅感覺，相信玩開12吋Figure嘅朋友最有切膚之痛，好似之前Hot Toys嘅War Machine，當初定價$1,180，依家已經上到差唔多$2,000大關。好在山口式「特攝系列」愈出愈有水準，最新上架嘅War Machine，雕功上色都有功架，可動性又高，仲有埋HT版欠奉嘅槍火特效組件，咁多嘢玩都只係$300有找，依家唔入咪後悔！
炭黑塗裝質感高
山口式War Machine成隻以炭黑色為主，再加少少銀色，細心啲睇，炭黑色用咗金屬塗裝打底，色調實淨，仲有些少金屬質感，喺反光效果下，就連面罩等銀色部件都有Metal Feel，正因如此，就算「粗玩」搞到周身花痕，大可加啲舊化變做「戰損版」，隨時愈污糟愈型仔。可動性方面，腰位嘅兩節式腹甲提升彎腰仰身嘅幅度，大髀內側嘅轉輪Ball Joint表面，又專登加裝「骨位」填補穿崩位，夠細心！至於背脊嘅火神炮用咗兩個轉輪關節組成，方便擰左擰右、全方位掃射。
槍火組件最有Heart
War Machine嘅重火力、重裝甲形象深入民心，山口式War Machine唔只有背脊嘅火神炮，雙臂亦各置機槍，仲可以喺所有炮口、槍嘴加裝槍火特效配件，擺出火力全開甫士，想半蹲發炮或者左右開弓都冇難度。可惜劇中飛天遁地嘅情節就無法單靠一盒War Machine重現，事關雙腳推進噴射特效配件、Display台座都冇隨盒附上，大家需要另購山口式Iron Man嚟借用，唔少玩具店就搬番晒早前嘅Iron Man出嚟賣，玩家不妨趁依家一併入齊。
查詢：2148 9483（精品）
SCI-FI Revoltech Series No.031 ((Iron Man 2)) War Machine $278
半蹲式全彈發射！
全身都係炭黑夾銀色塗裝炮製，上色冇甩油出界，QC做得唔錯。
交叉手左右開弓！
想幫War Machine擺到騰雲駕霧嘅飛天甫士，就要借Iron Man MK.Ⅵ嘅雲形特效組件幫手。
Marking都做得好出色，右上臂嘅空軍標誌、雙肩嘅型號字眼都印得清清楚楚。
背脊火神炮嘅炮身與支架用咗兩個Ball Joint連接，增加扭動範圍。
肩胛關節安裝喺上臂，舉高手時就唔會畀肩胛頂住。
上半身跟下盤之間有兩節腹甲製造腰位，增加擺動角度之餘，又遮到穿崩位。
大髀內側多出一大截疑似「骨位」，用嚟掩蓋髖關節嘅穿崩位。