特價機票靠Apps自由行

近期機票不斷做特價,搞到心郁郁又想再去一轉旅行玩餐飽。對自由行玩家嚟講,要顧慮的事情自然比跟團多,除咗出發前預訂好機票同酒店外,到達後又要擔心交通、食飯等切身問題,但好在現時App Store上有好多非常實用的旅遊錦囊Apps可供下載,可以在棘手問題上提供意見,去玩都玩得安心啲!

《Tips and Trip》旅人推薦景點

出發旅行前,大家都會買本旅遊書傍身,不過始終書內推介的都是非常大路的「食玩買」資訊,除非肯買本如磚頭厚的《Lonely Planet》,唔係都好難掌握真正旅人的第一身感受。只要下載這個免費App《Tips and Trip》,就可知道最地道、並由旅人提供的第一身「Best Kept Secret」推介。某程度上此App都甚有社交網絡功能,大家可以上載各推薦景點,其他朋友又可留言,最啱筆者這種即興的旅人。

下載費用:免費

《World Taxi─Fares and Tips》安心搭的士

去旅行唔識路伸手截的士,正常不過。但世界上唔係個個地方都好似香港搭的士咁平,在日本搭的士已經係天價,美國搭的士貴之餘畀少啲貼士更會畀司機鬧。《World Taxi─Fares and Tips》就列舉出世界上超過60個城市的搭的士指南,由起錶價錢到跳錶、可畀現鈔抑或可轆卡、再到搭的士安全性以至Call車服務都有,唔使怕人生路不熟畀司機開天殺價。

下載費用:免費

《Tipping Tips》貼士計算好幫手

外出旅行另一樣最困擾的事情係消費時到底要畀幾多小費先啱「國情」,例如喺美國餐廳食飯,畀少過10%貼士即表示食物以至服務質素都唔達標,好多時會引起不必要的誤會。《Tipping Tips》就搜羅全球108個國家、地區的服務費「習慣」,例如食飯、Bell Boy拎行李要畀幾多貼士;程式更設有計數機,只要輸入當時身處的地方,便會幫你計埋加上貼士後所要付上的總額。

下載費用:US$0.99

《Japan Post Office Navigation》搵郵局寄明信片

身邊不少朋友都喜歡去旅行時為朋友寄上明信片,但先決條件是要先找到郵局。日本的郵便局數目已經非常之多,尤其在東京、大阪等大城市更相當普遍,要寄信唔難,只要透過《Japan Post Office Navigation》這個免費App就可以清楚知道日本每個郵便局的正確位置,例如身處北海道富良野時想寄張明信片畀朋友,都可以從App內找到最近郵便局地址及開放時間,甚為方便。

下載費用:免費

《Airport Guide─iFly》滯留轉機搵資訊

去美國玩就預咗搭內陸機時會有誤點甚至取消航班的情況,筆者就試過多次經歷以上苦況。美國嘅機場面積普遍好大,滯留期間要搵地方詢問航機情況或者食嘢、休息都好麻煩。《Airport Guide─iFly》就係一個有齊美國大小 機場資訊的應用程式,可下載每個機場航運大樓的地圖,要搵出各辦公室以及餐廳商店都好方便。另外更提供到各航線的查詢電話及地面交通資訊,而接上Wi-Fi後更可知道機場最新的航班情況。

下載費用:免費

Brian