MP新版文哥擺甫王

對新一輩變形金剛粉絲嚟講，電影版「文哥」柯柏文（Optimus Prime，又叫Convoy）嘅超複雜造型一定入晒腦，不過喺一眾資深粉絲嘅心目中，都係陪咗大家廿幾年、賣相Old School嘅TV版文哥最上心。其實TV版文哥嘅商品數目已經多不勝數，老變旗艦級玩具系列Masterpiece（MP）喺2003推出嘅第一炮就正正係文哥；剛剛到港上架嘅MP-10 Convoy，仲可以有咩花臣？

MP10嘅盒面註明係「完全新規」，當然唔會咁小兒科轉少少色、跟多少少Parts咁敷衍，除咗造型更健碩、賣相比MP01更仔細外，更吸引係可動性大躍進，好似肩膊多咗組伸縮關節，唔只增加雙臂嘅擺動幅度，變身時亦更加Fit位，至於腰、髖關節、膝位，尤其是腳眼關節嘅活動能力都比MP01進步得多，擺甫士更自然、更有力，唔再硬繃繃。

大貨櫃玩意多

武器方面，MP10跟足TV版劇情，有齊激光槍及能量斧頭，兩者都比MP01有明顯改進，前者可以屈成四方形，再放入文哥背脊嘅暗格；能量斧頭就修改成直接套入右手拳頭，唔似MP01要拆咗拳頭先裝到。最好玩係貨櫃唔再得個樣，尾門可以打開及拉出尾板，畀小卡車駛出駛入。再者整個貨櫃可以左右打開，變成後勤基地，左右兩邊又可以拉出底座支撐，夠穩陣；除此之外，又可以將成個基地打直擺，將文哥放入去，變成維修狀態，擺甫士唔再只係出槍、出斧咁單調。

除咗文哥本體有大改進，MP10另一新賣點係加送博派嘅人類朋友、經常喺G1故事登場嘅Spike Witwicky人仔，平心而論做工唔算精細，不過好玩在四肢都有一定嘅活動能力，令佢可以放入小卡車、甚至貨櫃車嘅座位上面，陪住文哥一齊出擊，夠晒入戲。

含金量令人失望

有讚亦有彈，雖然新版文哥有咁多賣點，可惜不足之處亦令人失望，最為人詬病係MP10嘅金屬件少得出奇，只係腳背咁大把，相比MP01嘅心口及小腿都係金屬製成，實在難以服眾。另一方面，唔知廠方係想遷就個貨櫃箱比例，定係想與MP09嘅洛狄文（Rodimus Convoy）高度看齊，MP10竟然比MP01矮咗差唔多兩個頭，高度只有245mm，咁搞法，如果麥加登（Megatron）及星星叫（Starscreen）他日都出MP「完全新規」版，豈不是都要相應地縮水？Oh My God……

查詢：2302 1221（Hasbro HK）