山口式EVA 6號機月下刺客

海洋堂山口式（Revoltech）嘅「EVANGELION 2.0」系列推出以嚟，的確做到每款有Gimmick，難怪成為「特攝Revoltech」之外另一暢銷系列；繼初號機嘅發光LED使徒核心地台後、貳號機嘅旋轉飛腳……最新上架嘅「Mark.06」就參考咗《新劇場版：破》，利用月球部件加眼罩發光等招數，重現動畫中月夜出擊嘅神秘Look。

再玩發光功能

喺《新劇場版：破》首次登場嘅Mark.06，由EVA「第5適任者」，同時係「第17使徒」Tabris嘅渚薰駕駛，設計中除咗頭頂有光環、獨特頭冠及兩支觸角、V字形血紅色眼罩，以及主色由紫藍變深藍外，其餘部分就跟初號機大致相同。今次嘅山口式Gimmick就玩OVA當中，Mark.06由月球降臨大地狙擊初號機一幕，專登整咗個月面連光環特效組件，配合透光嘅頭部，LED嘅光芒就會經透明栓位直接射到眼罩上，做出紅眼效果。

素體承襲EVANGELION 2.0

山口式Mark.06嘅素體跟以往嘅EVANGELION 2.0一樣，都有S形蛇腰及高接疊性嘅手腳關節，可以輕易擺出極具人體工學嘅流線動作甫士。至於主體嘅陰暗主色跟早前推出嘅參號機感覺相似，不過改善咗參號機塗裝油出界嘅問題，Mark.06就穩定得多。武器方面，由於係使徒化身，所以Mark.06嘅裝備比較原始，只有一支長矛，好彩可換手掌有成七對咁多，配合專用台座，可以Chok出多種敏捷嘅刺殺甫士，月下刺客果然型過人。

查詢：2148 9483（精品）