明星餅店開新舖 食Froyo有掌

大坑食潮未停過，但多年前已植根這裏的Jam Bakery，最近卻衝出該區，選址炮台山開新店：眾星捧場的靚Cake有新口味推出，此店限定的Froyo更屬推介，全因自製Topping夠爆！仙人掌啫喱滑溜溜，一改周身刺形象，帶輕微甜酸幾好食，另有熱情果啫喱、玫瑰果醬、焦糖燉蛋等選擇，層層疊起賣相靚，未食已覺消暑！

這餅店向來多捧場客，更不乏古天樂、薛凱琪、徐濠縈及JM等明星，店主Anita早有意開分店，但尋遍都沒心水，直到走進炮台山的蜆殼街。新店開在舊街街角好搶眼，以黑白色做主調，掛着醒目橙色招牌，若說總店如像東京街頭的餅店，這裏就吹「西」風，透過落地玻璃望街景，坐低食Froyo都悠閒過人。

自製仙人掌啫喱

要數這裏的最大亮點，就是此分店獨有的Froyo。Froyo賣到成行成市，還可以有甚麼新意？店子雖只得原味乳酪，但Anita用上新西蘭脫脂奶炮製，香滑得來又健康，精彩處其實在Topping，10多款選擇，不乏自製的獨家配料，首推特別的仙人掌啫喱，以法國仙人掌蓉做原料，紅紅的正立方體，軟滑中又不失嚼勁，味道嘛？微微的甜微微的酸，易入口，還有點蜜糖味，幾得意。Anita笑言是被仙人掌蓉的色澤吸引：「這是法國那邊的新出品，紅紅的很吸引，便想到用來整啫喱，味道幾好。」她補充說因平日整蛋糕，所以會訂很多有趣配料做裝飾，沒料到變成Froyo Topping也不錯。

必試新口味靚餅

當然Topping中也有她的「手作仔」，像熱情果啫喱、玫瑰花醬、焦糖燉蛋及紅豆蓉等，用透明杯裝着，最能突出層次感。來這裏豈可不試店子的招牌靚餅？除有總店熱賣的綠茶紅豆蛋糕、藍莓芝士餅、德國芝士餅及拿破崙餅等款式，更特別推出新品，包括伯爵茶焦糖燉蛋脆脆蛋糕、脆皮榛子朱古力蛋糕及杧果軟心慕絲等。

想即場歎下午茶？簡單啦，一件餅加杯咖啡就得，細看餐牌，手調咖啡原來亦有新意，像帶點辣的Ginger Latte，可可味濃的Capuccino Cookie n Cream，為自己偷杯咖啡時間，不錯。眼看餅櫃內的蛋糕、甜點，排得齊齊整整，好吸引，牆上更貼有多張明星及蛋糕相，順手為至愛訂個靚餅，肯定冧爆！