VW人氣精品

用幾十萬元買部歐洲車，未必咁多人買得起，不過講到汽車精品，就平到幾十蚊都有交易。近年Volkswagen喺香港人氣急升，而其推出的精品系列，無論用料及手工都好像汽車一樣咁高水平，就以一件Volkswagen Motorsport外套為例，都係幾百蚊就有交易，而且質素仲拍得住運動大牌子！

服飾篇

Volkswagen Motorsport頸繩$74

Volkswagen喺過去40多年參加過唔少賽車運動，無論喺方程式或拉力賽都有好成績。想分享車隊嘅喜悅，唔一定要做車手或者技術員，大可買條Volkswagen Motorsport頸繩，扮吓車隊Crew都夠過癮！

自動伸縮雨傘$533

夏季常有颱風及雷暴，天氣變幻莫測，有把縮骨遮傍身最穩陣。Volkswagen縮骨遮備有自動伸縮功能，萬一遇上失魂雨，可以即時㩒掣打開，減低濕身機會。

Volkswagen Motorsport外套$662

唔夠半個月就係中秋，睇怕唔會再日日30℃過外啩，不過為免夜晚着涼，都係有件外套傍身穩陣啲。Volkswagen Motorsport外套以藍色為主，左邊胸口有Volkswagen廠徽，右邊膊頭就有「Volkswagen Motorsport」字樣，着住佢成個廠隊Crew咁款，夠晒型格。

實用篇

讀卡器$312

自從相機數碼化後，攞成打菲林去旅行嘅時代已成過去，只要1張4GB記憶卡就貯存到過千張相。依家SD及Micro SD都係主流嘅記憶卡，但部分SONY舊機仲用緊MS，Volkswagen多合一讀卡器就大派用場。

4GB記憶手指$302

USB記憶手指就同手機一樣，差唔多人人總有1支傍身，不過外形設計就大同小異。假如你係Volkswagen車主，不妨改選用呢款原廠記憶手指，外形似足VW車匙，就連手感都幾可亂真，容量方面有成4GB，足以應付日常所需。

擺設篇

Scirocco R Cup模型車$554/部

Scirocco Cup是1項由單一車型參賽嘅One Make Race，喺2009年引入中國，至今已經連續辦咗3屆，今年仲升級為Scirocco R Cup。Scirocco R Cup模型車就有多款車花選擇，比例統一為1：43，造工細緻，就算冇份落場都可以買番部日對夜對吖！