Back to School 勤學Apps

仲記得小時候開學日最開心就係有新嘢用，新書、新字典、新文具……呢個年代開學又有咩「新」呢？都係買番部新電腦、新手機同下載一系列新Apps最實際，一部iPhone在手就唔使帶計數機、重如磚頭的字典及三尖八角的文具返學，所以話高科技生活幸福到呢！

《iStudiez Pro》現代化手冊

有冇試過唔記得今日會上邊幾堂，到底要交甚麼功課呢？以前細個有手冊，依家有《iStudiez Pro》幫到手。只要輸入所需上嘅堂，要交嘅功課以及課外活動，程式就好似秘書咁幫你跟進住行程表兼交功課Deadline，差不多時候就會提醒你，而且仲會提你下一堂嘅時間、地點同內容，唔怕大頭蝦去錯課室上錯堂。

下載費用：US$2.99

《Geo Walk-3D World Fact Book》立體通識

讀死書無用o架，學生們都應該要認識我哋身處嘅地球到底係甚麼模樣。《Geo Walk-3D World Fact Book》就將好悶嘅資料同統計數字3D形象化，以有趣嘅卡片跟圖畫闡述世上500件你要知道嘅事，當中包括動物、人物及地方資料，有趣又有用，唔使刨書都可知天下事，至啱要讀通識嘅學生哥。

下載費用：US$0.99

《Merriam-Webster Dictionary》聲控查字典

買本字典開學，應該係唔少人嘅集體回憶，依家就可能係Download本「新」字典開學。免費版的《Merriam-Webster Dictionary》英文字典應是今年首選，唔好以為免費下載一定會偷工減料，這個字典App收錄字數夠多外，亦提供同義詞及反義詞，兼有真人發聲教讀音，更勁係玩埋Voice Search功能，對住個咪讀一次，就可以搵出對應英文字。

下載費用：免費

《180-in-1 Math Calculator》內置180條數碼算式

數學有大量公式要記，真係幾頭痛。只要在《180-in-1 Math Calculator》App內從不同數學範疇裏搵出相應公式，輸入數值就有答案，比篤計數機快得多。雖然《180-in-1 Math Calculator》係收費App，但筆者前幾日見佢仲係叫《179-in-1 Math Calculator》，一下子就變成「180」，Keep住Update，畀錢都畀得順氣。

下載費用：US$1.99

《iSetSquare》變身量角器兼間尺

三尖八角嘅間尺、量角器係最易唔記得帶嘅文具，《iSetSquare》就將這兩者合二為一再收進iPhone App之內，超級實用。程式更應用iPhone內嘅陀螺儀裝置，來感應角度嘅改變而測量出不同嘅夾角同角度；而畫面右方更設有約7cm嘅小型間尺，度量小型物件時就最好不過。

下載費用：US$0.99

《On This Day...》重溫當年今日

以前細個鍾意睇《當年今日》電視節目，用一兩分鐘時間就可以知道歷史上「今日」發生過甚麼大事。《On This Day...》就可以畀大家Check番每一日所發生過嘅世界大事，仲可以篤落每個項目上嘅連結作延伸導讀！這個App另一特點就係只要搖一搖部iPhone，就會即時Reload所揀選日子首頁。

下載費用：免費