聯賽開鑼手機Kick Off!

放完暑假，歐洲波就陸續開鑼喇！天字第一號忠實球迷，當然唔滿足淨係喺電視睇好波，賽前用各個足球iPhone Apps睇新聞、搵資料、做功課，自然大把「波經」同人傾，英超、西甲、歐聯……咩資訊都隨手掌握，分分鐘清楚過費Sir同摩佬啦。

《Euro Football》包羅所有歐洲賽

費用：免費

UEFA（歐洲足協）多年來為大家提供精彩的足球食糧，旗下賽事歐聯、歐霸、歐洲國家盃統統睇到大家如癡如醉，通頂都要睇，唔睇枉稱球迷。這個App主攻歐聯、歐霸及歐洲國家盃，提供各隊資料，News也相當豐富，而且有相有文，睇得過癮。

《Soccer Superstars 2011》球星由你育成

費用：US$0.99

睇見球星單刀橫傳，球迷定必大罵：「畀我射都入啦！」這新出的《Soccer Superstars 2011》足球遊戲就達成你願望，畀你育成球員參加比賽。除了可以用「G POINTS」改變球員外貌和波衫外，更可以不斷操練佢，儲夠知名度可學習必殺技。這App不追求3D靚畫面，但會提供60間球會以及3,000名球員資料，非常詳細。

《Soccer Express》中文睇料夠親切

費用：免費

英國波、歐洲賽係好多球迷的「飛佛」，但係世界上其實仲有不少聯賽，好似日職、巴甲都一樣燦爛，踢到甩髀。這個App提供世界各地20個不同聯賽的資料，包括即時比數、聯賽榜排名、射手榜、助攻榜等等，十分足料。此外，這個App採用繁體中文介面，中文譯名都好港式，車路士唔會譯做「切爾西」，夠親民。而較冷門的蘇超、葡超等比賽的球隊、球員都會用中文譯名顯示，唔怕睇到一頭霧水。

《Euro Football Stadium》比賽球場全面睇

費用：US$0.99

有別於一般足球資訊App，它基本上不會為你提供任何球壇News，反而主攻歐洲各聯賽的球場資料，一開App就可以在歐洲地圖上揀選不同地區及區內大大小小的足球場，App內會以衞星俯瞰圖顯示球場位置和附近的地理環境，等大家了解多些球場資料和鄰近環境。

《iFooty》球迷最愛英國聯賽

費用：免費

香港人對英國足球始終有份情意結。《iFooty》這個App就搜羅英格蘭各級聯賽的資料，對賽時間、戰果、新聞乜都有，仲有埋Chats功能給你以波會友吹吹水。而你更可以揀選最想關注的其中一個聯賽，一開App就會先列出其資料，詳細到連業餘聯賽Blue Square League都有，最啱「連汁都撈埋」的Hardcore英國球迷。