科幻迷：未來劍俠武御雷

或者大家未必知道山口式全新系列「MUV-LUV：Alternative」係乜東東，其實呢款勁有機戰Feel嘅「武御雷」，嚟自同名PC遊戲《MUV-LUV》；呢套遊戲分成3部曲，講述男主角白銀武一喺未來嘅平行世界，駕駛「戰術機」對抗外星生命體BETA嘅冒險故事，遊戲情節熱血之餘又有少少鹽花，係1款人氣高嘅「18禁」名作。作為玩具頭炮嘅武御雷，就係第3部《Alternative》中女主角御劍冥夜嘅專屬機體，係帝國斯衞軍之中達將軍級數嘅專用配色「戰術機」，變身山口式商品，高可動性充分反映原著嘅格鬥動感。

可動性贏晒

其實壽屋推出過唔少《MUV-LUV》模型，不過鬥動感，都係今次嘅山口式贏晒。事關只得12.5cm高嘅武御雷，已經有17個可動關節，當中肩甲嘅轉輪關節可作多角度旋轉，方便擺出雙手高舉等握劍動作，至於腰間嘅裙甲亦可以輕易向外揭起，無阻大腿活動，擺出跳躍、提腿等空中姿勢。武裝附件就有專用嘅74式近接戰鬥用長刀，射擊武器就有1把87式突擊炮，兩件武器都可以掛喺背脊，如果喺手腕裝埋1對00式近接戰鬥用短刀，仲可以雙刀揮舞，重現冥夜嘅拔刀劍法。

查詢：2148 9483（精品）