渣古打孖上 RG VS 蘿蔔魂
渣古嘅衍生型號多不勝數，重炮型、偵察型、高機動型、沙漠型、水用型……似足現實世界嘅軍備設計，不過講到最入腦、商品化程度最高嘅，始終係元祖綠色版本嘅MS-06 Zaku Ⅱ。最近渣古雙線出擊，RG模型版既有MG咁精細，仲改善埋揸武器時易甩手嘅慘況；另一邊廂「蘿蔔魂」Robot魂完成品系列唔只武器賣大包，而且周身開晒窿，做到全武裝上身。同一型號、兩種玩法，渣古粉絲點揀好？
繼舊年年尾嘅馬沙專用版MS-06S之後，眾望所歸嘅量產機MS-06F亦都剛剛加入RG系列，反而Robot魂出咗超過90款，依家先至第1次出渣古，仲要同RG同步上架，難道Bandai唔驚自己打自己咩？
RG標榜精密度
RG嘅MS-06F，講到明係太空專用嘅F型號，1/144咁細嘅比例，已經有1/100 MG級數嘅骨架、精密程度及唔錯嘅可動性，屈臂及屈膝時，上臂及大腿都有連動效果，膊頭亦有好驚人嘅拉出幅度，加埋深淺不一嘅裝甲配色，令整體造型複雜起嚟，唔似卡通版咁簡單。最開心係量產型渣古吸取咗馬沙專用版拎武器時Ball Joint手指容易甩嘅教訓，額外畀多兩款手掌，右掌係專揸武器，左掌係手掌張開嘅造型，拎起武器穩陣又有氣勢。貼紙方面，量產機仲追加埋小隊番號及軍階標誌，引你砌多幾盒，整成唔同小隊、唔同職級嘅渣古大軍。
Robot魂可玩性高
Robot魂一向標榜唔使砌、開盒即玩，同埋活動性超高等賣點，今次嘅MS-06就完全兌現晒，而且武器種類相當豐富，除咗熱能斧、125mm機關槍及250mm火箭炮呢啲招牌嘢，3連裝飛彈盒、手榴彈及RPG火箭彈都一應俱全，Robot魂版本仲畀多個原創武器架，可以掛起火箭炮等彈匣附件。最特別係首創Hard Point設計，渣古全身布滿細窿，可以將各式武器隨意插喺機身唔同位置，加埋隨盒嘅「菠蘿膊」及L形大盾，唔係老規矩各有1件，而係畀足1對，將渣古變成全攻型或全守型都得，畀玩家發揮創意。
後記：同根生 風格走極端
雖然同樣係渣古，不過RG及Robot魂嘅設計風格其實好唔同，除咗1款要砌、另1款開盒即玩外，RG就以實戰Feel及精密度取勝，素組加滲線已經有唔錯效果，不過關節可動性就比唔上Robot魂，而且始終改唔到RG系列容易甩甲嘅毛病。Robot魂嘅肥仔造型就傾向卡通原著，雖然個Look比唔上RG咁講究，不過關節任拗任扭，武器又多，擺甫士唔似RG咁多限制。簡而言之，RG勝在唯美，Robot魂就標榜好玩，唔怪得廠方會放心同期擺晒佢哋上架啦！
查詢：2433 1828（瑞華行）
RG MS-06F Zaku Ⅱ建議零售價：$239(左)
Robot魂 No.97 MS-06 Zaku Ⅱ建議零售價：$319(右)
美中不足係熱能斧嘅刀刃冇送到透明位組件，扮唔番卡通時嘅變色效果。
大腿外甲設有連動設計，屈起膝頭，外甲就會移位。
RG可作一定程度拗腰，擺到凌空發射火箭炮嘅甫士。
原則上獨眼都有連動設計，個頭擰去邊就轉到邊，不過效果唔明顯。
綠色組件都有4種顏色深淺度之分，膊頭位最顯眼。
只要善用原創武器掛架，就可以將全部武器裝晒上身，變成重裝形態。
Robot魂賣大包，菠蘿膊及L形盾牌畀足1對，後者仲可以加裝菠蘿針，變成手持武器。
雖然隨盒已經有火箭炮及RPG火箭彈等射擊型武器，不過仲欠咗支175mm加農炮喎？原來留返喺11月「魂Shop」推出嘅Mazera坦克先至補返。
打開天靈蓋，就可以左、右轉動獨眼，幅度比RG高得多。
全身加設多個Hard Point細窿，可以將武器任意插喺唔同位置，不過全身開晒窿，似乎有啲怪樣。
可動大比併 鬥跪
單膝跪呢種高難度動作，Robot魂做得較自然，RG版嘅上肢就要拗後，有啲勉強。
鬥揸槍
雙手揸槍呢種招牌甫士，兩者都輕易做到，統統Pass。
鬥撞
凌空肩撞甫士，RG膊頭拉出幅度較大，可以成個肩甲拉向前，Robot魂就比唔上。
RG版（右）勝在Detail位夠多，分色又講究，偏向實戰Feel；Robot魂（左）就忠於卡通原著，帶啲Baby Fat，不過清簡到滲線都冇，懶咗啲喎！