瞬間轉移鍊過界《Driver San Francisco》

單純鬥快、玩飄移甩尾的賽車遊戲已無法完全滿足到玩家。Ubisoft即將推出的《Driver San Francisco》就夠破格，創出即時轉車揸的超能力，發覺唔對路時可以瞬間轉移駕駛另一架戰車，用拖頭撞到對手飛開，甚至乎可以轉移到對手駕駛座幫佢揸埋車，認真突破！唔計呢個超強賣點，淨係在人來車往的三藩市街頭橫衝直撞，就好有《GTA》Feel！

虛擬旅行睇景點

其實《Driver》賽車系列係長青的遊戲之一，不過出Game頻密程度當然比唔上另一邊廂的《Need For Speed》系列，對上一集已經係2007年出品。去年《Driver San Francisco》在E3中展出，大家都以為遊戲會在去年年底推出，點知一拖就拖到今時今日先面世，好在玩法另類搭夠。齋睇遊戲名稱都知道遊戲會在三藩市取景，所有市內的地標、景點都統統出場，未去過當地的朋友仲可以當成一趟「虛擬旅行」。不過遊戲唔甘心做一隻普普通通的城市街頭賽車Game，廠方都好着重故事性，今次就講誓死都要捉到罪犯的警探John Tanner，在三藩市內駕車追捕大罪犯Charles Jericho，甚有荷里活賽車片格局。

死過翻生學識超能力

但John Tanner並唔係一般警探，實情係一個超能幹探。話說遊戲安排警探先生遭遇一宗嚴重車禍，點知好番後竟然得到名為Shift的即時轉車駕駛的超能力，在控制一輛車的途中，一眨眼就可轉到另一部車上駕駛，真係犀飛利，當然都係做戲咁做啦！即時換車最大好處係可以擅用唔同車輛的優點，在車水馬龍的街頭上逢車過車追賊，追到賊車撞到佢行唔到就可以完成任務。大家甚至可以轉到對手的車輛駕駛座逼佢炒車都得，真係想點玩都得。電影感亦係《Driver》系列的強項，除會加入一如美式漫畫的分鏡外，遊戲內亦加設剪片模式，畀大家錄低追賊時的飛車片段然後自行剪輯，可以整齣Director's Cut畀大家睇！

120款靚車登場

賽車遊戲當然唔少得車，雖然《Driver San Francisco》並唔係主力賣大量名廠超級跑車的遊戲，但一樣都收錄約120款真實車種上場，不過可能為了配合美國街景的氣氛，唔少車款都係60、70年代的美國老爺車，當然新車方面一樣都有，譬如2011年款McLaren MP4-12C。除以單人之力追賊車，亦唔少得連線上網玩網上對戰模式，遊戲設有9個線上模式畀大家玩，而且線上模式亦能使用到「Shift」快速換車超能力，不過自問方向感麻麻的玩家就要花多少少時間練習。新一集遊戲在設計上都頗突破，加上《Driver》系列全球累積銷量超過1,400萬，保證有咁上下好玩，未玩過這系列遊戲的玩家就要試吓！

INFO

類型：賽車

開發：Ubisoft Reflections

平台：Xbox 360、PS3

推出日期：9月1日

售價：$359（Xbox 360）

　　　$388（PS3）

查詢：2418 8896