翻Hit重慶雞煲
是咁的，重慶雞煲潮又來喇！
想當年，一道「重慶雞煲」熱爆全港，先食雞再打邊爐，食法創新，啱晒貪新鮮的香港人，但之後熱潮逐漸回落……
原來，這惹味雞煲近年有翻Hit迹象。後來者中，以「來來重慶雞煲」做得正宗誘食欲，先在大圍起家，短短時日這股香氣已吹襲太子、元朗，上月更連開尖沙咀及銅鑼灣兩店，成為今期流行。食不食由你，我反正食了。
坐街邊食雞煲，當然夠風味，但想坐得舒舒服服，就不妨來銅鑼灣新店。有卡位，望開揚街景，更設貴賓房，自成一國，置於中間的開放式廚房，專門生啫雞煲，全店瀰漫陣陣香味，令人胃口大開。
即點即煮值得等
這裏的雞煲可選半隻雞或一隻雞，辣度亦有大中小程度，照顧不同需要。但無論你點揀，先旨聲明，起碼要等20至25分鐘，點解？因為這裏的雞煲全部即點即煮，醃雞，燒鑊，爆香料，煮雞及焗香一氣呵成，雞煲上枱熱辣辣，連爐上夠保溫，雞件嫩滑入味，正！店方表示雞煲受歡迎，全因夠惹味：「先將辣椒乾、陳皮、當歸、花椒、薑蒜、洋葱、芫荽等爆香，再煮雞件，先至最入味，更用上自家秘製雞醬來醃味及煮雞，所以特別好食。」
食完雞煲打邊爐
原來如此，難怪可日賣過百煲。食完雞煲，剩低雞醬精華，千萬別浪費，可免費加雞湯打邊爐！銅鑼灣店會供應美國雪花牛肉、蔬菜及其他配料。不妨將焦點轉移至其他美食，像四川水煮、湖南乾鍋等，或是想要點涼拌，川湘粵小菜都可以。推介有湖南乾鍋大腸，同樣有小爐保溫，邊食邊聞到麻辣香，大腸肥美而不油膩，甚有嚼勁，伴飯吃更一流。
惹味三寶
來來做到出色雞煲，選料好是其一，其中花椒、辣椒乾從四川運來，味道正宗，加上自家秘製雞醬，令到雞煲惹味、刺激，試過就知回味無窮。
查詢：2891 9017
重慶雞煲 $178/隻
選用清遠雞，混合秘製雞醬、辣椒乾、陳皮、當歸、花椒、薑蒜、洋葱、芫荽等炮製，刺激中帶點濃香，食完可加湯打邊爐，一煲兩食最盡情！
蒜泥白肉 $38
片得厚薄適中的五花腩，沾上自家製的紅油，作前菜非常開胃。
四川水煮白鱔 $108
有如血池地獄的賣相，令嗜辣之士好想挑戰！白鱔鮮甜肥美，大豆芽菜亦不能少覷，同樣出色。
川式香辣豬手 $68
特別揀來細細隻的豬手，入口不肥膩，以花椒、乾辣椒烹調，添上幾種層次。
湖南乾鍋大腸 $78
豬大腸惹味而不太膩口，味道剛好，加入芝麻增添香脆。有小爐保溫，食到尾仍然暖笠笠。
這銅鑼灣店走較高檔路線，卡位可望到街景，夠開揚，另設可坐8至12人的貴賓房，食飯有私人空間。
置於店中間的開放式廚房，專門生啫雞煲，一入內即聞到陣陣搶鼻濃香，好想即刻食。
雞醬
店方沒透露成分，只知全由專人炒煮、再分給各分店使用，味道香中帶甜，專門用來醃雞及烹調。
花椒
要麻辣，這麻字正是來自花椒，手碰到即沾上濃郁味道，嘴碰到則輕微麻痺，過癮呢！
炒辣椒乾
四川運到還不夠，師傅還自行炒香辣椒乾才用，比一般的更香濃。