紫菜 薄脆稱王

去韓國旅行,諗起買手信就頭痛,好彩,至少還有佢─紫菜。當地紫菜選擇多,口味新奇,最緊要又平又好味,同事們、朋友們總算收貨。不過,香港人都好幸福,勝在咩都有,想食紫菜好容易,韓國風、日本味,甚至泰國出品的都好易搵。到底邊款又薄又脆又有紫菜味?一塊原味紫菜,即見真章。

小時候,相比薯片、蝦條,紫菜算係矜貴零食,市面選擇少,通常都係細細包透明裝,仲要每包得5片,食完就冇,要慢慢歎至得。但今時唔同往日,行去超市即大把靚貨,而且以韓國貨為主,大大片,好惹味,泡菜味、芥末味、烤肉味等,睇見都覺吸引,但若論最經典、最受歡迎的,相信都係原味。薄薄一片可透光,摸上手不太油膩,聞落有天然紫菜香,放入口更有咔嚓聲響,非常脆口,應該就係良品滋味。

查詢:(A)2918 9986 (B)2299 1110

P.Yeung

小老板脆紫菜(經典味) $12.9(B)
泰國出品,愛食紫菜的一定識,大大包內有超過20片,每塊長度約近15厘米,幾誇張!紫菜經製過,食落較為油膩,而且要快手食,否則開封後好易變腍。

韓國三父子紫菜三包裝 $11.9(A)用攝氏300度高溫橄欖油速烤而成,紫菜味、橄欖油味道濃郁,幾好食,惟油分較多。

宗家府傳統海苔 $10.9(A)
品牌賣泡菜出名,紫菜質素亦不錯,薄、脆、每片都有透光效果,入口馬上有紫菜質感,味道剛好不覺鹹。

永井八包即食紫菜 $35.9(A)
比併中唯一日本貨,傳統日本紫菜,質感挺身,有嚼勁,味道濃香,入口令人想起軍艦壽司、手卷的味道。

東遠韓國鹽燒紫菜 $13.9(A)
有20年製紫菜歷史的品牌,據說只揀選11月至3月之間的優質海苔,紫菜味適中,有種芝麻油香味,幾吸引。

大象鹽燒紫菜八包裝 $13.9(A)
同樣薄、脆,摸上手質感如紙張,非常輕身。但味道偏淡,紫菜味不算突出。