疤面新星Blitzway 1/6 Scarface

講到疤面煞星，唔只拜仁嘅列貝利，《Scarface》仲經典得多啦！呢部喺1983年由Brian De Palma執導、Oliver Stone編劇嘅黑幫電影，堪稱經典中嘅經典，由影帝Al Pacino主演嘅Tony Montana，更被視為唯一可與教父齊名嘅黑幫角色。咁深入民心嘅電影Icon，交到新Figure廠Blitzway手上，估唔到會爆發咁驚喜嘅化學作用。

近年Hot Toys及Enterbay能夠橫掃1/6 Figure市場，License愈嚟愈吸引固然係原因，不過一眾韓國頭雕師嘅鬼斧神工更加功不可沒。至於由Blitzway出品嘅Tony Montana，由上色、頭雕、服裝到包裝都由韓國師傅一手包辦，聽到已經係信心保證。

出完韓星 轉攻荷里活

提到Blitzway呢個韓國品牌，大家可能比較陌生，日本網友卻耳熟能詳，事關佢嘅前身曾經出過《冬日戀曲》男主角裴勇俊嘅1/6Figure，被當地師奶瘋狂搶購。早前公司改咗新名，以新形象示人，由以往主打韓國影視明星，轉為市場更大嘅荷里活電影系列，﹁Scarface﹂就係頭炮。為隆重其事，公司請嚟曾為Hot Toys製作《教父》頭雕嘅原型師Inae Kang主理，從實物所見，完全捕捉到Tony Montana嘅兇悍神情，皺紋、刀疤及鬚根都有極高水平，加上塗色自然唔誇張，像真度唔比Enterbay嘅同名作品遜色。

西裝稱身 西褲吊腳

小記採訪過好多Figure大廠，都認為西裝最難做，剪裁欠佳就會變成衣不稱身。雖然Blitzway經驗尚淺，但係Tony Montana嘅西裝水準完全唔似新手所造，筆挺得嚟有齊腰位及褲骨位，就連袋巾、關刀領等Details都做到足，唯一缺點係西褲太短，蹲低時有啲吊腳。受角色所限，配件唔算多，只有四款可換手掌、M92F手槍及雪茄，不過張大班椅就好有教父味道，最重要係可以當地台用，坐低擺甫士零舍有「大佬格」！

查詢︰2895 1162（Metro Comics）