隔空叉爆 DoCoMo SH-13C

第一次聽到無線充電，個個都拍爛手掌，求其將部手機放上充電板，唔使拮、唔使插就能充電，簡直夢寐以求！可惜等到頸都長，手機界前年先有部Palm Pre用此技術，但係又唔多受歡迎。等了又等，此技術終於由日廠接力，DoCoMo新機SH-13C就能隔空充電，飛走插蘇，勁方便！

無線充電技術並非新事物，去年Powermat便曾推出手機專用的無線充電板，其後任天堂Wii Remote亦跟風照玩，而傳聞未來的iPhone也會採用這充電方式；這「舊」科技今次卻首次應用於日系機SH-13C，對哈日族而言甚具吸引力。

安全又方便

「隔空充電」雖然易明，但正式技術名稱，應該叫「電磁感應技術」。用戶充電時，只需把SH-13C放在隨機附送、酷似外置硬碟的充電板上，充電板便會透過共有磁場為手機充電；過程中手機毋須接駁電源線，也不用四圍搵火牛，最重要是比傳統方法安全好多，濕手都唔怕觸電。另外，充電板具有電源控掣功能，只要100%餵飽，便會立即停止供電。惟注意的是，此技術最大缺點是充電時間長，實測所見，約4小時才能叉爆，若着機叉速度更大幅減慢，心急用機的話真係等餐飽！

防偷窺技術

日系機出名樣靚身材正，SH-13C亦不例外，不但提供珍珠白、黑及粉紅3色，電池更早已植入了電力接收功能，因此手機毋須外加接收殼；好處是厚度可減至10.9mm，而且直接把電池放在充電板便能充電，用戶可邊叉手機、邊叉後備電。屏幕方面，日系機的解像度大多只有480×854，但SH-13C卻提升至qHD質素，配合Sharp AQUOS顯示技術，畫面靚到爆！此芒還加入了「VeilView」防偷窺技術，開啟後側望只能看到花紋，實行趕走八卦精，設計夠貼心。

手寫入中文

日本人對Smartphone接受能力愈來愈高，SH-13C就採用Android 2.3系統，雖然是預設的公版介面，但內裏就有不少微調，例如首頁最多可加至12版，比一般7至8版可放更多Widgets；另外程式集又可分類兼改名，方便管理。另外，它既符合IPX5/7防水標準，同時又不設SIM Lock，跟今夏一眾日本機睇齊！可是此機竟用microSIM，使用前要先裁卡，有點不便。另外值得一提，此機雖只有英、日介面，但就可手寫中文，編寫SMS不遜於行貨中文機。