《Deus Ex：Human Revolution》21世紀超人類黑客

《Deus Ex：Human Revolution》的Main Artwork真係甚似《22世紀殺人網絡》！不過，遊戲故事背景就無拉到22世紀咁遠，只是21世紀2027年而已。身為保安人員的主角被襲擊至瀕死，在非自願的情況下接受納米晶片移植，唔單止救得番，而且仲變成半人半機械，手臂更可變成多種工具……點解咁似《百變星君》嘅星爺？此遊戲將射擊、角色扮演、潛入、入侵系統同角色升級幾大元素集大成，《Deus Ex》闊別幾年重出江湖，實行大晒冷！

植入晶片變超人

年資深嘅PC Gamer，都應該聽過《Deus Ex》系列大名，第1同第2集分別在2001年同2003年推出，第1集當年曾獲多個遊戲大獎，稱得上係經典遊戲。新作《Deus Ex：Human Revolution》如以出版年份計，可稱為《Deus Ex 3》，但實情故事背景設定卻早第一集遊戲25年，即2027年。話說當時納米生物科技技術已經成熟，將納米晶片植入人體會將普通人變成超人，結果惹來野心國家搶奪，身為生物工廠保安的主角Adam，就在被入侵者襲擊下瀕死，結果被有關單位夾硬植入納米晶片變成超級人類，要解開偷襲真相以及復仇，完全係好荷李活電影橋段囉！

講求劇情推展

變身成超級人類當然有着數，就係手臂可以變出多種唔同殺人武器，而且仲識得短暫隱身，在「睇我唔到」的情況下潛入敵陣。主角出場氣勢似《Matrix》，但玩落卻似另一套集射擊跟角色扮演的遊戲《Mass Effect》，唔止喪打喪射追求官能刺激，更講求劇情推展，要花唔少口水對答，對答技巧高低又會影響故事發展，如第一個任務要說服敵人釋放人質，大家如太過個人主義，嫌談判麻煩一槍做低敵人的話，雖然解決到當前問題，但對日後劇情卻有所影響。

化身黑客Hack電腦

Hack入電腦系統跟隱身潛入是今集遊戲兩大賣點，講頭腦、身手同策略，這方面又似《Splinter Cell》要神不知鬼不覺下潛入敵陣。遊戲中主角要成為黑客，並非為咗要Hack入金管局或Facebook，而係要解開各種電子鎖入侵系統。雖然每個電子鎖保密度唔高，只係4字密碼，但要在短時間內搭通天地線解開密碼並唔容易，一不小心有甩漏都會惹來大批敵人圍剿。

玩Game最過癮當然係開槍駁火，《Deus Ex 3》可用上各式重型槍械攻擊敵人，但始終一槍了結敵人唔夠快感，於是新加入多種近距離搏鬥招式，配合埋主角的變身超能力，可打到敵人落花流水。遊戲在採用新Unreal遊戲引擎下，激鬥場面的畫面表現比《Deus Ex》第1及第2集進步得多，話晒前後相差8年，遊戲製作技術同硬件性能上無進步就弊啦！

Info

類　　型：射擊 開　　發：Eidos Montreal

平　　台：Xbox 360、PS3 推出日期：8月26日

售　　價：$359（Xbox 360）、$379（PS3）

查　　詢：2418 8896