Chat Room

家庭版 記者 Ivy

身邊朋友都換晒Smart Phone，我這個摺機死忠粉絲點都不肯換，但有時因為冇Google Map而迷路、又或「送車尾」時，都會突然心癢癢想加入他們的大家庭。惟有得閒找一下Smart Phone的弊處，堅定自己的信念，例如：篤得螢幕多手指公會痛、看電腦多個腦會遲鈍、上得社交網多性格變古怪……有天，無意中看見一個專講萬人憤恨、大鬧「低能」的Autocorrect功能的網站，我一邊睇，一邊笑到炸裂！（例子：把父親想說的「Disney」變成「Divorce」）

家庭版 記者 Rachel L

自從有了Chatroom這個「地盤」之後，雖然篇幅只有一格仔，但已足以成為我放肆的空間，每次寫甚麼題材，腦海裏都不用盤算：「呢個季節寫啱唔啱㗎？」、「會唔會有人寫得太多呢？」、「題材會唔會唔夠（偽）潮呀？」所以我決定「無啦啦」提下《潛行凶間》上位型男Joseph Gordon-Levitt，最近冇乜聲氣？香港冇上佢嘅戲啫，明年上映的《黑夜之神2》就有佢份，香港應該會上吧？不過，上戲是其次，因為我從來都覺得，真正嘅「好嘢」是不應受時地域限制的，好戲兼靚仔的更是。

家庭版 記者 Rowena

最近股市狂瀉，港交所網頁又有黑客入侵，令股仔蒸發咗唔少資產，大家嘅富翁之夢隨即破滅！惟有安慰吓自己，相約朋友仔排排坐，唔食水果玩大富翁。點知玩唔夠兩個鐘，本來一直領先的朋友仔，响一個Round裏急轉直下，連踩4次火車站兼接連抽咗3張懲罰卡，坐監、交稅輪住嚟；最後佢更入住我嘅豪華酒店，一Q清袋！黑仔嘅佢，只好望住我哋幾個笑到標眼水，黯然脫離大富翁行列。