冷氣救兵　除異味趕霉菌

炎夏揸車外出，難免會開盡冷氣，如果伴隨住陣陣涼風嘅係難聞異味，實在尷尬萬分？豐田沙田維修中心維修部經理Alen Wong教路，難聞氣味多數源自污糟嘅冷氣塵隔及系統喉管，仲隨時匿藏成千上萬嘅細菌，長期吸入會影響健康；車主一族咪再偷懶，記住要定期清洗及檢查冷氣系統。就汽車冷氣問題，Alen指出當冷氣系統啟動，相關部件嘅溫度就會降低，熄咗就會回升，加上香港天氣又熱又潮濕，容易孳生霉菌，久而久之就會形成異味：「乘客帶上車嘅氣味都會滲入冷氣系統，最普遍嘅例子係喺車廂內飲食，食物氣味會被系統嘅空氣循環功能抽入管道內，同霉菌結合後，難聞程度就更嚴重。」

用香精適得其反

對付異味，多數車主都會用汽車香精，實情係自欺欺人，仲會令問題惡化，因為香精含有大量化學物質，同食物氣味及乘客體味一樣，被吸入空氣抽進冷氣系統內，就會積聚喺喉管裏面，好難清除，Alen補充話：「系統塵隔都係必須留意嘅地方，佢就好似屋企嘅冷氣機隔塵網一樣用嚟阻隔微細塵粒及雜物，如果塵隔已經積聚一定分量嘅塵粒，失效之餘仲會畀細菌孳生，對乘客健康構成影響。」

超音波徹底除污

原來車廂空氣系統咁易藏污納垢，又有咩解決方法呢？最好當然係幫冷氣系統大清洗，現時各大汽車代理維修部，以及坊間車房都會提供呢類服務，就以豐田代理皇冠車行為例，不時推出清洗及檢查冷氣系統套餐，Alen簡介：「每次幫客人清洗冷氣，我哋會先將首飾箱後面嘅冷氣塵隔拆出嚟檢查清楚，若果發現變黑，當然要換啦。之後以超音波將清潔劑灑落車廂每個角落，開埋冷氣系統嘅循環功能，將清潔劑帶入喉管，從而消除裏面嘅污糟嘢及細菌，最後用臭氧機淨化車廂空氣，異味、細菌就冇機會留低。」

半桶水DIY因小失大

除咗清洗冷氣系統，定期檢查亦同樣重要，因為系統部件會隨住車齡增加而老化，喉管、沙樽滲漏都係平常事，所以Alen提醒大家幫座駕進行維修檢查時，最好同時Check埋冷氣系統。常用嘅檢查方法除咗查看冷氣泵及皮帶狀況外，仲會睇埋喉管有冇滲漏，以及探測車內溫度，Alen提醒：「若果車主想自行清洗車頭蒸發器嘅話，要留意胡亂清洗或者整濕部分機械跟電子部件，有機會導致故障；至於坊間宣稱有清洗冷氣系統功能嘅清潔劑，其實只可以清潔表面，亦有可能破壞系統部件，我哋就唔建議隨便使用呢類產品，都係交畀專業人士處理穩陣啲。」

查詢：2880 4101（皇冠汽車）

清洗冷氣全餐

豐田代理今期就推出多項清洗冷氣優惠，第1項係車主可以$998享用包括清洗冷氣塵隔、散熱器及前蒸發器嘅「豐田冷氣清洗服務」，配合「豐田特級車廂空氣淨化服務」，徹底清除車廂及冷氣系統嘅細菌及微粒。若果想再進一步，趕絕埋座椅及地氈嘅有害物質，畀多$525就有埋「豐田車廂蒸氣護理服務」。除此之外，車主可以7折價錢更換冷氣風隔，倘若經檢查後需要更換冷氣組件，仲有6折優惠，優惠期由即日至10月31日，有興趣就早啲致電Book期喇！