on.cc 東方互動主頁

Sony VPL-HW30ES 趕絕重影

3D投影機玩到100吋影像，煲碟、睇戲固然震撼，但透過3D眼鏡欣賞時，畫面因為鏡片阻隔而顯得昏暗，勉強提高畫面亮度，又會影響暗位嘅實淨感，令黑位變灰，陷於兩難局面。Sony針對上述問題，於最新3D投影機VPL-HW30ES引進動態燈泡控制系統（Dynamic Lamp Control）來調節亮度，令畫面亮麗清晰；同時暗位亦夠黑夠實淨，配合智能開關同步技術，將3D影像常見嘅重影問題減至最低，動態畫面流暢自然，夠晒電影感。

近期3D TV售價下調，40吋過外嘅型號都只係$10,000鬆啲有交易，吸引力固然有，不過想在家中體驗戲院級嘅震撼感，輕鬆投射出百吋大畫面嘅3D投影機先係王道，Sony VPL-HW30ES就係最新代表。

動態燈泡控制黑位回復層次

如果你試過用3D投影機煲碟睇戲，都應該會注意到，當透過3D眼鏡睇戲時，畫面會因為鏡片阻隔而顯得昏暗，暗位變得黑埋一堆，以為勉強提高畫面亮度就解決到問題？適得其反係暗位實淨感冇晒，令黑位變灰。反觀VPL-HW30ES用咗動態燈泡控制系統，透過200W Ultra High Pressure Lamp燈泡，因應3D眼鏡嘅快門開關而控制亮度，將亮度提升至1,300流明，畫面亮麗清晰之餘，暗位仲Keep到實淨嘅深黑色，就算睇《蝙蝠俠黑夜之神》之類夜景場面極多嘅電影，黑位依然層次分明。

智能開關同步提升流暢度

現時3D戲院主要採用被動式偏光技術，反觀家用投影機就多數採用主動式快門技術，雖然畫質較細膩，但要喺3D眼鏡安裝快速開關快門，長時間收睇，就會容易出現重影，睇到眼都花。針對呢個問題，VPL-HW30ES引進智能開關同步技術，微調快門開關時間，確保用家雙眼能夠觀賞到準確影像，令重影機會大減，配合支援240Hz嘅SXRD全高清面板，加埋Motionflow技術以增加每秒顯示嘅影像數目，令動態畫面更流暢自然。

2D轉3D優化影像

VPL-HW30ES支援2D轉3D功能，可以將電視節目、打機、DVD等2D視訊轉變為3D，並設9項畫質模式供選擇，例如針對唔同片種嘅Cinema 1、2、3模式、令高速打機畫面更流暢嘅Game模式，以及能忠實表現相片色彩嘅Photo模式等，用家可因應唔同視訊源來選擇，就算係投影初哥都可以輕鬆優化畫面細膩感、色彩及層次感。

試播一場充滿動感嘅跳舞場面，舞者高速起舞跳躍，畫面都流暢自然，完全冇窒吓窒吓，Motionflow技術發揮出應有功效。而且暗位夠黑、夠銳利，勝過傳統單片LCD及DLP機。

試播3D版《守護神傳奇》，光位亮麗清晰，暗位夠黑夠銳利，動態燈泡控制系統應記一功，試睇時間雖然唔長，但完全睇唔到3D投影機常見嘅重影問題，貓頭鷹飛翔時等動態畫面亦流暢自然，充滿電影感。