Ori iPad2機殼 勁過變形金剛
雖然iPad2有專用嘅Smart Cover，可惜只係保護機面，機背仍要長期「裸跑」，未能讓Apple粉絲安心。如果想買個硬淨、保護性又強嘅機殼，不妨考慮JOBY新推出嘅Ori，佢主要以鋁材製作 ，不但保護性強，最特別係機殼備有多個摺疊位，簡單將鉸位扭一扭，就可以將iPad斜放、企高或旋轉，簡單嘅斜台以至凌空高架都變到，仲勁過變形金剛！
角度任扭Fit晒位
市面上嘅iPad2套，大部分都係用塑膠或皮革製造，前者易碎，後者就老套唔夠潮。Ori機殼外層係鋁，而內層、摺疊鉸位以至iPad2固定殼就用塑膠製造，保護充分之餘機殼亦夠輕巧。另外，保護屏幕嘅蓋掩仲用咗超細纖維物料，加埋磁力感應器，令機殼可以做到Smart Cover般嘅屏幕自動開啟功能，非常實用。
Ori iPad2機殼 $790
鉸位之間裝咗榫位，就算企高都好穩陣。
收埋所有鉸位，Ori嘅外形同一般機殼分別不大。
斜放時金屬鉸位都算穩陣，不過仍貼心加埋小型榫位，夠晒安全。