Reporter's Choice

夏日三文魚薄切

香港有好多靚餐廳，個人心水有精品酒店Upper House內的Café Gray Deluxe。身處49樓望維港夜景，兼有名師Andre Fu的室內設計，一流！難得連食物質素都不俗，而且以一星米芝蓮餐廳來說，價錢合理，好像晚市供應的4道菜Summer Market Menu，連餐飲不過每位$675。最鍾意頭盤選擇之一的Salmon Carpaccio, Caviar Cucumber Salad，三文魚油潤肥美，滑不溜口，跟魚子醬及青瓜沙律幾夾。菜式每2星期轉換，經常都有新鮮感。

窩心法式蛋奄列

有飯食，已經好感恩！不知從何時開始，坐低慢慢食Lunch，成為生活的奢侈品。在連跑多間雜貨店後，決定好好慰勞自己，走到荷里活道新開的agnès b. CAFÉ L.P.G.，來一個芝士煙肉洋葱奄列。食到最愛的雞蛋，雙眼會瞇成一條線，感覺好幸福！餐牌標明選用走地雞蛋炮製，奄列嫩滑，有蛋汁溜出，芝士軟綿綿，還可拉成幼絲，相比前一日食過的3隻完全熟透荷包蛋，這奄列簡直是天堂，食完不禁大叫「我已經充滿力量喇！」

女模的迷人杧果撻

久聞中法靚女模Amanda S.開餅店，上月底終於開張喇！據同事報料Amanda會看舖，我即時火速幫襯，隨意買2件小餅，竟得Amanda開口教路：「杧果撻如果隔一陣至食，返去公司要先放雪櫃一陣，好食啲o架！」說時樣子非常專業。對，就是這件杧果撻，撻皮薄又鬆脆、有牛油香，杧果新鮮甜美，食完都不覺膩，有水準，跟Amanda一樣迷人。