精選日漫火影最撐
日本漫畫題材多樣化，由傳統嘅幻想冒險、熱血運動，到感人小品，幾千奇百怪嘅故事都有，唔怪得每年動漫節，日漫都一樣咁有睇頭。就趁聽日開幕前，筆者為各位日漫迷搜羅以下精選，既有全新篇章，亦有劇場版，甚至資料集都有埋，當中最撐場首推《火影忍者》，一次過出4本劇場版，鳴門粉絲要帶夠彈藥入場喇！
《火影忍者》四連發
《火影忍者劇場版—大興奮！新月島的動物大騷動》$68
鳴門、阿櫻及阿李跟隨鹿驚老師奉命保護月之國王子回國，遇上大臣招請流氓忍者篡國叛亂。鳴門堅守對月之國王子嘅保護承諾，聯同各種動物參與營救行動。
《火影忍者疾風傳劇場版—火意志的繼承者》$68
4名來自不同忍村、具有血繼限界嘅忍者突然相繼失蹤，同時一個叫卑留呼嘅前木之葉忍者，以巨大幻影姿態到處辣火頭，打算引發第四次忍界大戰！木之葉面臨被猜疑，並且遭受攻擊威脅，眾人危在旦夕！
《火影忍者疾風傳劇場版—鹿驚外傳 戰場上的少年時代》$48
故事設定於原著第1部與第2部之間，揭開鹿驚老師鮮為人知嘅秘密。話說啱啱升做上忍嘅鹿驚，遇上第三次忍界大戰，聯同內輪帶人及阿凜進行任務，但途中阿凜失手被擒，鹿驚會唔會為咗繼續任務而放棄同伴呢？
《火影忍者劇場版—大激突！幻之地底遺跡》上/下冊各$48
風之國受神秘裝甲士兵突襲，我愛羅率部掃蕩；另一邊廂鳴門等人接獲任務，又畀裝甲騎士攻擊，途中鳴門唔小心與裝甲騎士齊齊跌落懸崖。與此同時，巨大要塞喺天空出現，到底連串事件背後有咩陰謀？
《龍珠》大補完
《Dragonball Landmark》《Dragonball Forever》各$55
兩本設定集收錄晒整個龍珠世界觀，《Landmark》記載少年篇至菲利篇，《Forever》就交代故事後半部，即係人造人篇至魔人布歐篇嘅所有登場人物戰鬥，仲有鳥山明唔少製作秘聞，龍珠粉絲必備天書。
全新篇章
《火影忍者劇場版—大興奮！新月島的動物大騷動》$68
《火影忍者疾風傳劇場版—火意志的繼承者》$68
《火影忍者疾風傳劇場版—鹿驚外傳 戰場上的少年時代》$48
《火影忍者劇場版—大激突！幻之地底遺跡》上/下冊各$48
《Dragonball Landmark》《Dragonball Forever》各$55
《Billy Bat》第1、2期各$40
《Billy Bat》係美籍日裔漫畫家凱文筆下嘅暢銷偵探故事，偶然得知日本都有類似嘅漫畫人物，為咗搞清自己有冇抄襲之嫌，於是遠赴日本尋求真相，竟無意捲入一連串怪異事件。
《爆漫》第13期$30
最高提出想獨力繪畫人氣作家短篇祭嘅短篇，秋人答允，自己亦專心準備白鳥嘅連載；本應係彼此變得成熟嘅一步，最後兩人卻產生微妙變化……順帶一提，會場仲有燙金特別版發售。
《孤高之人》第5期$35
榮獲2010年度第14回日本文化廳優秀賞嘅《孤高之人》，今期講述獨來獨往嘅森文太郎，為咗獨自攀爬而間接令啟蒙老師喪命，後嚟為咗挑戰K2，文太郎決定加入二宮嘅攀山隊，進行一連串特訓。
《全能人！廢能事！》第1期$35
《爆粗Band友》作者若杉公德嘅最新搞笑之作。平凡高中生嘉郎經歷一個月圓之夜後，發覺自己有讀心術異能，仲打算聯同其他異能人改變社會，但卻招惹了一大堆用異能做無聊事嘅核突變態佬。
《怪．刺繪本》$42
怪奇漫畫大師伊藤潤二聯同蒐集家木原浩勝，將一個又一個真實嘅怪譚幻化成繪本，由伊藤操刀營造氣氛，加上木原故事提案，更加插為紀念本作而創作嘅漫畫，要你愈驚愈要睇。
《青之祓魔師》第6期$30
為應付敵人來襲，保護「不淨王之右眼」，明陀宗展開大會，點知會議反而增加大家對達磨嘅不信任；正當勝呂感到焦躁不安時，真正嘅背叛者終於揭開真面目。
《aru PACA friends》$68
風靡全球嘅可愛動物「草泥馬」—羊駝，全身毛茸茸軟綿綿，表情傻更更，最鍾意同成班朋友仔做盡搞笑可愛事情。隨書附送Memo Pad一個，仲有3款選擇。
