革新港漫　熱血技擊聯乘

聽日就係香港動漫電玩節2011開幕嘅大日子，無論你係宅男或者腐女，都預咗銀包大出血、唔去唔安樂啦！作為東道主，港漫又點可以失禮，近年嚟興起嘅小說改編浪潮，今屆亦都再接再厲，就連畫壇宗師黃玉郎都睇中科幻派嘅《佣兵天下》，實行將原著類近Online Game嘅世界觀，與港漫擅長嘅技擊畫面二合為一，畫風夠晒出位，以後咪再話港漫獨沽一味只識打喇！

睇《佣兵》　似打Online Game

古裝武俠係港漫最常見嘅題材之一，不過睇得多都悶啦，身為玉皇朝嘅掌舵人，黃玉郎就決定搞搞新意思，選中內地著名網上連載小說家「說不得大師」嘅科幻小說《佣兵天下》做藍本，由黎巴嫩等4位知名編劇全力度橋，加埋蔡景東做主筆，以港漫嘅細膩筆觸，將原著嘅神兵利器及伏魔法術，仲玩轉龍族、狼族、異獸族、精靈及人類等界別，跳出文字嘅畫面；睇過原稿，唔只打鬥場面保持港漫嘅生動多變，構圖上亦做到原著嘅浩瀚氣氛。故事方面講述主角艾米．哈伯以僱佣兵身份接受各項任務，從中與唔同職業、其他種族嘅角色合作，譜出恩怨情仇，有齊闖關、升呢、打大佬等Online Game元素，Game友必Buy！

攤位：D15

《銅人》擺檔　龍出沒注意

九把刀原著、經由邱福龍與鄺彬強聯手打造嘅港漫版《少林寺第八銅人》及《功夫》熱賣，唔只掀起改編熱潮，同樣熱血爆燈嘅故事及畫風，亦令沉寂已久嘅畫壇再現生氣。勢頭咁好，梗係唔好畀佢停，福龍動漫就會喺今屆ACG推出多款銅人精品，包括戰甲模型、護腕匙釦、頭套匙釦及銅人全畫集等，龍記粉絲喺攤位購物滿$3,000，仲送650×325mm會場限定水晶膠海報一張，據知邱福龍仲會不定時喺攤位突襲現身，「龍友」想見偶像甚至攞簽名，不妨多啲入場把握機會。

攤位：D13、D18

《武道狂》出書　快過出劍

早前推出嘅《武道狂之詩》漫畫版第1期大獲好評，第2期喺書展推出後，第3期將會火速喺ACG現身，出書之快仲勁過主角燕橫出劍，而且特別版有精美燙金盒加三款《武道狂之詩漫畫版》磁石書籤送畀粉絲，報答大家花時間排隊。

攤位：D20-D22

唯美《迷男》　情海浮沉

期待多時嘅劉雲傑新作品，終於喺今屆ACG蒲頭，仲搵嚟杜比做監製、Bon編劇，質素令人期待之餘，最希望幫手Keep到出稿進度，唔使等成年先出下一期啦！睇封面有型男美女，就估到係佢最擅長嘅愛情小品，到底係講主角點樣型英帥靚正迷暈萬千少女，定係就算情場殺手鬼見愁都會迷失於錯綜複雜嘅感情？就要大家捧場買本睇真啲，序章除咗用黃書紙印製，再送跨頁海報。

攤位：D37