艷陽靚橙　smart仔特別版

玩潮、玩In最耍家嘅smart，經常推出繽紛鮮艷嘅特別版本，最近抵港嘅smart fortwo coupe mhd edition nightorange，車身就用咗黑色撞鮮橙色，充滿夏日氣氛，而且加裝埋新設計嘅LED霧燈，陽光下搶鏡指數再度飆升。

smart fortwo向來係撞色專家，今次嘅nightorange特別版更係Best of the Best，橙色、黑色撞埋一齊，對比夠晒強烈，而且象徵熱情嘅鮮橙色，同夏天堪稱絕配，再襯埋閃令令嘅LED霧燈，想唔引人注視都幾奇！

車廂改動多

車廂方面，繼續奉行smart fortwo嘅簡約路線，只設雙座位，謝絕閒雜人等坐順風車，啱晒拖友。不過受制於車身細細，所以尾箱容量只係有限，放兩至三袋物品就滿載，好彩特別版多咗唔少花臣，換咗高桶式真皮座椅外，中控台儲物格都多咗橙色條紋點綴，就連門邊裝飾板都改埋橙色，地氈亦係nightorange特別版款式，都可算畀足誠意。

mhd停車熄偈

動力方面，900c.c.直三引擎都有71bhp馬力及9.3kgm扭力，對於車重只有750kg嘅smart fortwo嚟講，夠用有餘。仲記得早年駕駛smart仔，波箱頗有「手波」Feel，一般嘅自動波用家未必習慣，不過新一代波箱上場後，運作暢順好多，而且加速能力都唔錯，喺大直路踩油，用埋加減波模式，車速錶好快已經指到80km/h，比起以前爽快得多。而且新smart仔加入mhd（micro hybrid drive）功能，輕按波棍台嘅ECO掣，停車時引擎就會自動熄火，加油後會重新啟動，可以慳到8%耗油量，唔怪得smart仔已被政府認可為環保汽油私家車類別，令車價得以下調。