至型奸仔Look HT 1/6 New Goblin

喺《127小時》人氣急升嘅James Franco,其實喺《Spider-Man》已經鋒芒初現,綠魔形象有型有款;今日重遇,再度披起網紋綠魔戰衣、腳踏黑色飛行板,兼且手執鋼刀,就算縮細到1/6 Figure比例,風采依然!

去年尾發表1/6蜘蛛俠後,HT嘅《Spider-Man》企劃正式開始,第二炮就係新綠魔New Goblin,稍後仲有Spider-Man Blacksuit黑蜘蛛,三部曲形式推出,蛛迷要小心荷包硬化。

雙頭雕兩個Look

講番今次嘅新綠魔,演員係炙手可熱嘅James Franco,靚仔唔在講,而且喺新頭雕師Noh Sung Woon手下,Figure面相尚算神似,薄唇、眉頭緊鎖等特徵都捕捉到,稍嫌眼神唔夠銳利,若果兇狠多少少,就更貼近角色性格。另外,蜘蛛俠得一款頭雕,新綠魔送多一個面具Look,不過留意面具同臉部係一件過製作、除唔到,收貨時咪亂試。

Sky Stick識發光

HT近年嘅造衫技術愈嚟愈成熟,蜘蛛俠就有幾乎冇駁口嘅緊身衣,新綠魔都唔失禮,上身係尼龍物料,挺身又有彈性,雙臂掛鈎就混合膠件及布料,中筒靴用PVC膠製成,色澤及形狀都跟足戲服,尤其是小背心,背後嘅膠扣及Detail位勁多,手工差啲都做唔到。配件方面,三把唔同長度嘅配刀及Pumpkin Bomo小炸彈都只係小兒科,最正係飛行滑板Sky Stick,內藏電池及LED燈,兩邊渦輪位可以發出綠光,配合透明支架,只要花啲心思,就擺到有型嘅飛行甫士。

查詢︰2388 4677(玩具狂熱)

*圖中為試辦款式,與正式推出的版本或有少許分別。

Gilbert

HT 1/6 New Goblin Limited Edition
零售價︰$1,180 預訂價︰$1,130
發售日期︰今年第3季

緊身衣係尼龍彈性布料,表面有網紋,似足戲服。

背心勁多Detail位,仲有埋刀鞘,放得落成把配刀。

中筒靴勁有立體感,而且塗裝一流,燈光下令立立。

隨盒只有兩對可換手掌,削咗啲喎!

手臂嘅倒鈎用膠同布混合製成,落足心機。

New Goblin用過嘅武器統統落齊,收貨啦!

送多個面具Look,粉絲記住面具同面孔係一件過,唔除得o架!

面相都算OK,官方審批咗兩次就Pass,如果眼神再兇狠啲就更似。

滑板係原塊PVC,兩邊渦輪裝咗LED燈,亮度十足。

底部個摩打可以360°旋轉,開關掣就喺旁邊。