《L.A. Noire》睇表情 破艷案
玩偵探查案嘅遊戲一向都唔多，主因係要營造出引人入勝嘅劇情，並同時帶出角色嘅微妙心理變化，實在困難。今年Rockstar卻偏向虎山行，開發出一款以40年代洛杉磯做背景的偵探遊戲《L.A. Noire》，故事既用上經典兇案加上大量考究的情節來加強真實感外，亦引進「MotionScan」系統，將細微的人物表情變化呈現到遊戲內，係今期必玩之選！
參考經典案件設計
無論係《GTA》抑或舊年嘅《Red Dead Redemption》，兩款由Rockstar Games主理嘅遊戲都做到叫好叫座，按牌面，呢隻《L.A. Noire》都應該撐得過，而且遊戲開發小組仲落足心機，重現出40年代的洛杉磯情景，無論係建築物、衣着、汽車甚至電話亭的設計，事前都經過大量資料搜集，似足荷里活A級片製作。講到電影，如果大家幾年前有睇過套《The Dark Dahlia》（《艷屍案中案》），遊戲故事主軸就係講緊這位女演員被分屍的兇案，以及再參考同時代案件來虛擬出其他案情，等遊戲主角散仔Cole Phelps一步一步抽絲剝繭偵破世紀懸案。
自由度高似《GTA》
話晒遊戲主角係警探而唔係歹徒或馬賊，所以《L.A. Noire》唔似《GTA》系列或《Red Dead Redemption》咁可以隨街殺人，但遊戲自由度都唔低，可以駕駛警車在路上奔馳，不過撞車或撞親人都一樣要賠錢。另外，遊戲內嘅追逐同打鬥場面都係點到即止，重點主要落喺案發現場嘅搜證同盤問證人過程。但各位又唔使太擔心查案時會毫無頭緒，因為同行拍檔會指示出下一步行動嘅方向，而且行近重要證物時，遊戲仲會響起特別音效，只係大家要有心理準備，遊戲中會面對血淋淋的屍體甚至裸屍。
專業演員拍攝表情
好似《L.A. Noire》呢類偵探遊戲，最着重嘅係點樣從疑犯或證人中套取有用資料，因為就算係殺人犯都唔會在額頭鑿住「我係兇手」，所以要從佢哋微細嘅表情變化中，搵出邊句係真話，邊句係大話。為咗真實呈現角色嘅表情，遊戲特別引入名為「MotionScan」的技術，用足32個鏡頭拍攝專業演員的表情，再套落遊戲角色上，因此就算戚一戚眼眉，或唔覺意做出一個心虛的表情，都可以完全反映出來。
INFO
類型：懸疑推理
開發：Team Bondi／ Rockstar Games
平台：Xbox 360、PS3
推出：5月20日
售價：待定
查詢：2359 7998
主角身為探員，查案時當然唔可以隨便使用暴力。
執行任務時通常會有拍檔傍住。
故事主軸在於名震一時的女演員被殺案，主角可以點樣破案呢？
最初只會承接如追捕疑犯等簡單任務。
遊戲初期主角Cole要着住件軍裝查啲小型案件。
主角後來會升職做便衣，處理案情較複雜的兇案。
遊戲內40年代的洛杉磯市都造得幾逼真。
到底邊個先至係主犯呢？
正常情況下疑犯唔會自己招認，留意佢哋嘅表情係關鍵。
唔似得《GTA》咁見人就打，但一樣可以開警車去查案。
引入「MotionScan」系統，用足32個鏡頭拍攝專業演員的表情。