動物園歎茶記
到酒樓歎番一盅兩件是不少人每日的例行公事，但日日都係蝦餃燒賣叉燒包，終有一日食到厭。老公知我最怕悶，話要帶我到動物園歎茶喎！咁爆？原來係帶我到鴻星一嘗新推出的創作點心，大廚將多款甜鹹美點變成大笨象、白兔仔、貓頭鷹、豬仔、老虎等，造型可愛，叫我點捨得放入口喎？
鴻星海鮮酒家向來諗頭、動作多多，由多位中菜及點心大廚組成的廚部團隊，不甘局限在傳統中式酒樓的框架裏，除了定期由世界各地引入奇特食材外，還不斷將中式點心改頭換面，為客人帶來新鮮感。像新一輪推出的動物點心，便將各式鹹、甜點，甚至煎炸點心，以可愛賣相重新包裝。據旺角分店點心部主管蔡師傅表示，製作這類點心的難度在於造型的像真度及大小比例，反而餡料沒太多規限。另外每件點心的工序比一般的繁複，首先要用靈活的手指搓製出雛形，然後用輔助工具塑造動物的表情，最後還要用適當的食材或麵糰組成五官，少點心思手藝也不行。
查詢：2628 0890
小飛象 $24外層口感有點像鹹水角，餡料則有叉燒、沙葛及菜脯。另用了牛耳做象耳朵，餅乾條做象牙，超可愛呢！
幸運兔 $24迷人紫兔仔，雖然只得個兔仔頭，但長長的耳朵，趣致得很。餡料則是紫心番薯，入口不太甜膩。
彩蝶餃 $21這隻彩蝶用了素食做餡，餃皮薄薄的，還有雲耳、紅蘿蔔及雜菌增加口感。
小豬嘜 $17胖嘟嘟的小肥豬其實是包點，雖然內裏只得麻蓉，但造型已攞滿分。
貓頭鷹 $24難得炸過的奶黃酥經師傅加工後，依然Keep住貓頭鷹模樣，勁！
王老虎 $28頭仔圓圓的老虎，肚裏滿是海鮮粒及素翅，賣相如此討人歡心，問你點捨得食！
有15年做點心經驗的蔡師傅說，動物點心的餡料可塑性甚高，無論鹹、甜、素菜都適宜。
要動物點心做得神似，除了要有想像力外，還要靠一對巧手和泥膠工具幫助。