細細碟的美味

你以為一日只有三餐？別忘了最精彩、最輕鬆的Happy Hour！這個叫西班牙人最興奮的時刻，呼朋喚友湧入酒吧，飲酒傾偈食Tapas直至天黑。這些細細碟的美食，跟酒精、笑聲產生化學作用，歡樂的氣氛，叫人人投入開懷。羨慕當地人識得享受生活？Tapas Bar在香港愈開愈多，你隨時也可以來Viva（西班牙文解作高興、萬歲）一下。

Viva Ana 正宗風味

西班牙人無Tapas不歡。本地Tapas Bar─Viva Ana，其西班牙籍行政總廚Francisco Pazos說：「當地人好遲食晚飯，所以會去酒吧飲嘢食Tapas，同朋友傾吓偈。食Tapas好隨意，可以每間酒吧都飲杯酒食碟Tapas，然後轉場，或者索性將Tapas當晚飯，由朝食到晚都得。」Francisco Pazos來自西班牙北部的Bilbao，當地會稱Tapas為Pintxo，他指Tapas款式叫人花多眼亂，基本上任何食物都可以變Tapas。數經典款式，當然是風行全國的西班牙火腿及西班牙奄列，前者昂貴不是每日有得食，後者個個識整。

引入得獎火腿

而Tapas近年更殺入本地食界，開業未夠一年的Viva Ana，格局似足西班牙Tapas Bar，氣氛Causal，一入門口即見火腿高高掛，這擁有70年歷史的品牌Beher，獲獎無數，更是西班牙國家足球隊的指定火腿，大有來頭，這裏更只入Bellota級數火腿，分32及36個月兩款，甘香豐腴。另一主角Tapas超過30種，有齊肉類、海鮮及蔬菜，款式更新舊糅合，經典代表有西班牙奄列、蒜片蝦、酥炸魷魚圈等，創新的包括香脆蝦配蒜蓉沙律醬、牛柳配紅椒蓉及甜洋葱。Chef Francisco補充話，尚有不時轉款的Chef Special，甚至可請佢為你炮製獨家Tapas，例如是分子美食，夠晒驚喜。

烏蠅同國王 爭酒飲？

今日大家有得食Tapas，或者要多謝烏蠅。Tapas喺西班牙文解作蓋子，Chef Francisco講故事：「好耐好耐以前，西班牙國王去郊外玩，覺得好熱同口渴，就入去一間小酒店抖抖，店主為國王奉上一杯酒，因怕烏蠅嗜甜爭酒飲，就用麵包及香腸蓋着酒杯，國王知道原因後好開心，再柯打酒時，就同店主講記得畀埋個『杯蓋』佢。」

酒逢Tapas 最啱Key

享受Tapas的精髓，在於邊飲邊食。Chef Francisco表示：「若說最佳配搭，個人認為是Sherry配西班牙火腿，因火腿帶甜香多汁，可跟乾身的酒作平衡。Sangria多數是夏天飲，其餘像餐酒、啤酒則一年四季都啱，呢度全部都有供應，其實飲食是個人喜好，揀鍾意食、鍾意飲嘅就係Perfect Match。」

查詢：2832 6660