美版《TROY無雙》木馬屠城

繼月中推出嘅《真．三國無雙6》後，原本3月底KT Games仲會多一款《TROY無雙》見街，但係遇着日本大地震而被迫延期發售，好在美版《Warriors The Legends of TROY》能如期推出，只係遊戲介面及對白全部變晒做英文，玩法同內容跟日版完全相同，對於唔識睇日文嘅朋友來說，可能會更有吸引力。

歐洲史詩式背景

《無雙》一直都帶有一騎當千、馳騁沙場嘅爽快戰鬥感，新作首次由加拿大工作室人員操刀創作，一班鬼佬就諗到以古希臘時期詩人荷馬筆下嘅「伊利亞特」史詩中，所描述嘅特洛伊戰爭做題材。故事講到沿海國家特洛伊王子帕里斯，搶走希臘城邦斯巴達王妃海倫，引發希臘聯軍進攻特洛伊嘅戰爭故事。

一擊必殺夠血腥

遊戲會提供希臘篇同特洛伊篇兩個視點，除咗重現番「木馬屠城」呢幕咁震撼嘅場面外，英雄奧特賽嘅多場著名戰役亦統統收錄，大家可以一邊打機，一邊了解歷史，夠晒生動！而且為凸顯古歐洲戰士嘅戰鬥風格，遊戲會加插以盾牌衝刺嘅「Down攻擊」，以及一擊必殺嘅血腥感，當然陣形上的配合亦相當重要。另外，戰場上更會有奧林帕斯眾神派遣巨人大佬亂入殺敵，包保大家打到好似睇《戰狼300》咁刺激！

Info

類型：動作

平台：PS3、XB360

人數：1人

開發：KT Games

售價：約$460（美版）

查詢：2710 8825