Chat Room

Gilbert

潮流興3D，電視、電影、雜誌都3D，四月更有一套鹹片用3D技術拍攝，宅男一定開心死。然而，並非跟風就一定好，好似最近3DS就被投訴打得耐會頭暈兼嘔心，引來玩家們在NeoGaf、AVForums等討論區大肆批評。專家話，由於3D影像需要眼睛及腦部配合才看到，裸眼技術加重兩個器官負擔，長時間觀看自然辛苦到暈！小記早前就試過同類技術嘅SoftBank 003SH，結果單係睇Menu就有點頭暈眼花，最後都係要熄咗3D功能才能繼續用。所以話，所謂3D，其實一啲都唔Free！

波

唔知係咪人老咗，真係會特別着重健康，尤其是好似我呢啲天資有限又為食，但又想着靚衫嘅人，眼見自己肚皮開始微脹又鬆弛，終於頂自己唔住。近月開始Keep住運動，當中以每個星期六或日嘅踢波為主，上個禮拜仲晨咁早入咗東涌踢，夠晒誠意喇啩！加埋天氣開始轉熱，連埋游早水，希望可以燃燒多啲脂肪，唔好變咗隻Bear Bear熊身形就好啦！

marcovaldo

多年前《瘋狂約會美麗都》（《Les triplettes de Belleville》）的驚艷，今年電影節第一時間就揀咗這位法國導演的新動畫《幻象師》（《l'illusionniste》），結果當然沒有令我失望。從劇本、主角名稱及造型，都向着電影大師積葵大地（Jacques Tati）致敬，動畫講述中年魔術師十年如一的戲法，隨着年月已無法滿足因相信他戲法而跟隨他的少女以及整個世界，最後選擇黯然離去。故事吸引不在話下，動畫上五十年代的愛丁堡街景更美得無話可說。照推斷《幻象師》應有機會在bc上映，值得捧場！