《NFS Shift 2》Alice B. 午夜飛車

《Need for Speed Hot Pursuit》出咗都未夠半年，咁快又有新一集？查實呢套剛剛上市嘅《NFS Shift 2 》跟《NFS Hot Pursuit》，由製作公司以至玩法都好唔同，《NFS Shift 2》玩番賽道鬥車賺錢開啟隱藏靚車，今集仲加入午夜飆車同頭盔視點兩個新賣點，以及收錄咗大量Dream Car，難怪識貨嘅Alice B.，一嚟就揀咗首次收錄嘅Pagani Huayra超跑！

上次《NFS Hot Pursuit》玩嘅係兵捉賊，一係揸警車追截賊車， 一係掉轉身份逃避警車追截；而《NFS Shift》系列就返璞歸真到正常賽道比賽，玩家要做出好成績嚟賺錢買零件同啟動新車。

過百款超跑任揸

《NFS Shift 2》雖然唔似得《GT5》咁有幾百架資料勁詳細嘅真車畀大家揀，但遊戲入面收錄嘅近百款靚車，架架大有來頭，好似Alice B.所揀嘅Dream Car Pagani Huayra，最高時速達370km/h，身價更超過100萬美元，而且今次仲係首次喺電子遊戲上出現。至於同場嘅陳偉霆就冇揀到歐洲車，而係揀咗架線條好吸引嘅日本Nissan 370z，一樣出得大場面。兩位親身上陣試玩時，都有板有眼，可見遊戲並唔難上手，Alice B.轉頭玩多次已控制得好好。

親身挑戰世界賽

年半前推出嘅《NFS Shift》，坊間反應唔算特別好，所以第二集開發小組Slightly Mad Studios就為《NFS Shift 2》加碼，加入咗唔少新特點，其一係增設夜間賽道，玩家要爭做「黑夜之神」，感覺都幾新鮮！賽道同賽車數目都有增無減，遊戲收錄咗幾十條賽道，好似上海賽道同東京賽道，玩落好親切，而賽車方面更收錄咗近百款Dream Car！喺職業模式中，仲可以親身挑戰用上真實賽車同車手嘅FIA GT1世界錦標賽同GT3歐洲錦標賽，玩法都幾豐富。

頭盔視點玩連動

遊戲亦保留咗汽車改裝一環，由引擎、車身以至懸掛系統等統統都有得改，比賽賺到錢後就可以自己Upgrade。今集《NFS Shift 2》更突破地加入頭盔視點設計，令大家玩得更投入；不過實試後發覺其實跟車廂視點差別不大，純粹搞吓Gimmick！值得一讚嘅係《NFS Shift 2》沿用上次《NFS Hot Pursuit》加入嘅Autolog社交平台，可隨時更新戰績同挑機外，亦加入跟舊作連動嘅功能，無論係之前玩過《NFS Shift》、《NFS Hot Pursuit》甚至係《NFS Underground》都會免費得到經驗值同金錢，仲可以開埋隱藏戰車，都算對得住班忠實Fans！

機檔案

類型：賽車

開發：Slightly Mad Studios

平台：PS3、Xbox 360、PC

售價：$380（PS3）

$329（Xbox 360）

$300（PC）

查詢：3166 6001

你要識！

高橋名人（任職於日本遊戲公司Hudson）

* 原名高橋利幸，1959年於北海道出生，在1985年至1990年代活躍於遊戲界。

* 最為人津津樂道是他的「16連打」絕技，可持續保持一秒鐘連續按鍵16次的紀錄，80年代中的全盛期更曾做出「17連打」。

* 曾經在《高橋名人之冒險島》系列遊戲中擔任主角。

* 因為連打絕技，令他有機會出唱片、做卡通片主角、拍攝電影及電視劇。