Android手機玩LBS即興搵食

早排Google與多間藝術博物館合作，將地圖街景服務延伸到館內，令到大家足不出戶都可以睇盡名畫、藝術品，Gimmick十足。其實Google Maps一直都唔止地圖功能咁簡單，仲可以透過唔同嘅Apps提供超強嘅定位服務，以後出街都可以即興搵食搵嘢玩，夠晒Free！

全名為Location-Based Service嘅地理位置服務（LBS），主要是透過無線網絡來確定手機位置，以便提供相關地區嘅資訊，LBS程式即會自動篩選出所在地附近嘅有用資料，非常方便。

《YiYi─HK》土炮覓食

Android版嘅《Openrice》只能適用於指定手機型號，始終未夠大眾化，今次介紹嘅《YiYi─HK》同樣可以透過定位服務幫你搵出附近的食肆，而且仲會分埋粵菜、日本菜等類別，大家又可以扮吓食神寫食評，加上新設嘅Local Wall，即時同其他網友分享，夠晒互動。

免費

《慳番D》股票式報價

依家通脹愈來愈嚴重，啲錢好唔見使，絕對要「慳得1蚊得1蚊」。《慳番D》就幫你格盡各大超市貨品，而且仲會顯示埋每件貨品的現價、升跌、波幅，十足股票報價，實用又過癮。大家又可以留言同其他買家分享抵價心得，想慳番幾個錢就要下載喇！

《街旁網》中國版打卡

《街旁網》玩法同Facebook嘅Check-in一樣，透過LBS找出用家嘅位置，然後再分享到平台上。《街旁網》可以為景點寫評論，又可以上載圖片，或者有邊個網友嚟過都睇得到，玩法畀Facebook更多變化，值得推介！

免費

《香港搭車地圖（beta）》本地巴士通

一眾巴士公司都冇出官方App，去到陌生地方要搵吓巴士站喺邊都幾麻煩。雖然《香港搭車地圖（beta）》介面簡單，不過勝在夠直接，一開App就會自動搵出你嘅位置，再輸入埋目的地就可以幫你搵到適合嘅巴士路線，以及所在地附近嘅車站資料。小記實測後發現，搵站速度快，不過App內提供嘅車站位置唔算太準，美中不足。

免費

《Wikitude World Browser》導航百科

有時去到一個新景點，都想順道認識一下當地嘅歷史，咁就一定要下載《Wikitude World Browser》。新App將LBS整合到Google搜尋器、Wikipedia、YouTube等超過20個網站，只要喺地圖上點出目的地，便可即時連結到相關網站，最重要是《Wikitude World Browser》支援全球多個國家，好啱出門旅行！

免費

《香港小巴》小巴大典

呢款《香港小巴》App內置咗大量綠Van資料，有齊路線、站頭、車費，更細心到連分段收費都有紀錄，資料齊全。最方便係可以搜尋埋附近路線，小記試用後發覺，唔使10秒即有結果，據講遲吓仲會加入埋紅Van資料，令人期待！

免費