Chat Room

科技版記者貓科

早前成班朋友約打War Game但又怕辛苦，小記就建議佢哋去室內War Game場，可以揀玩射BB彈嘅電動氣槍，或射中都唔痛嘅雷射槍。其中雷射槍嘅玩法有好多變化，因為每個人開槍、中彈，畀邊個KO嘅資料都會由電腦記錄下來，玩完之後，可以來個賽後檢討，睇吓邊個係神槍手或者殺人王。最正係全日冷氣開放兼營業至深夜四點半，放工食完飯去玩都有大把時間。

科技版記者Alfred

小記想喺30歲前「上車」呢個願望，終於實現了！辛苦儲來嘅積蓄雖然一鋪清袋，但係嗰份滿足感就大到連自己都唔信。所以呢排一得閒，就會到處行傢俬舖同電器店，事關要用有限嘅資金去添置基本家品，的確傷腦筋。而小記第一件買嘅家具，就係一款布藝梳化，仲要係自訂尺寸同埋自選布料，一諗起下個月有得收貨，真係瞓覺都會笑醒！

科技版記者Vincent

早排iPad 2推出，全球又再大炒特炒，就以旺角先達為例，原價$4,000唔使嘅16GB Wi-Fi版，炒上近一倍至$7,500。點知蜜月期唔夠一個月，Apple就公布iPad 2將會喺4月於香港、南韓、新加坡等地開賣，炒價頓時直插兼冇人接貨，炒家梗係叫苦連天啦！計我話，iPad 2絕對炒唔過，皆因平版電腦唔算必需品，需求冇手機咁大；想賺錢嘅不如吼實Apple官網，打吓iPhone 4主意好過啦！