Ray Sir出手句句有核

元祖高達RX-78-2出過嘅模型，手指加腳趾都數唔晒，再Die Hard嘅粉絲都嗌悶啦！精明嘅Bandai腦筋急轉彎，唔出高達……住，但就發掘佢嘅隱藏商機。走軍事模型風嘅U.C. Hard Graph系列，就以名副其實嘅高達核心—核戰機（FF-X7 Core Fighter）為題，唔只大賣集體回憶，精密度仲比田宮、長谷川等老牌軍事模型廠有過之而無不及，難怪首批貨一到港就沽清，仲掀起炒風。今次就由模型達人Ray Sir親身示範，再話你知呢款機有幾勁！

以往嘅核戰機模型，由1/60嘅PG，到1/100嘅MG及1/144嘅HG，都只係高達Boxset嘅附件，今次終於喺U.C. Hard Graph獨自孭飛做主角，仲係1/35嘅大比例，夠晒噸位。

Detail指數爆燈

開盒一睇，唔似一般高達模型咁多組件，不過分模及分色都好有質素，既有密麻麻嘅線位及鉚釘位，機翼又有指揮燈，最抵讚係駕駛艙，儀錶、操縱桿、瞄準器樣樣齊，Detail程度係頂尖嘅軍事模型級數。除此之外，核戰機可以變成Core Block駕駛艙形態，而且機身有上揭式飛彈匣，機師座椅又可以後轉90°，將動畫中嘅特色設計一一還原。隨盒跟咗四個人仔，包括駕駛員、指揮員、阿寶及馬茜，啱晒整情景模型，就連水貼都有埋阿寶專用機及馬茜專用機，以及G-3版嘅唔同Marking，仲唔係慫恿粉絲買多兩盒、砌齊三個Version？

四大Check Point

紙上談兵讚花香後，係時間開壇實戰，筆者請嚟「Ray Hobby」嘅掌門人Ray Sir幫手「堅砌」外，仲有碗話碗、有碟話碟評論呢款模型嘅得與失；有高手教路，開工時有咩注意事項，就心中有數啦！

雙層儀錶易上色

「儀錶板多數都係單一模件，就算高手點油都難免出界，呢部機就罕有咁將儀錶板分成兩件，顯示器同面板分開，易上色好多，減少好多後期嘅修補工夫。」

遮蓋紙欠奉

「白色玻璃框貼紙只係普通貼紙，觀感好假，自行上色就要裁啱遮蓋貼紙去遮住玻璃。其實Bandai可以效法其他廠嘅戰機模型，送張Fit晒位嘅遮蓋貼紙方便玩家。」

大增細節位

「今次係大比例作品，廠方為機身追加咗好多新細節，好似垂直尾翼嘅減速板、機身白色排氣腮位，以及機翼底部嘅原創導彈，令成部機更細緻、更真實。」

車轆車軨一件過

「機身分色唔錯，但係車轆同車軨，原本應該係黑白分件，但竟然一件過黑件就算，難道廠方會唔知玩家喺黑件上油白色會好花工夫咩？既然玩軍事模型Feel，點解唔試吓車轆獨立用軟膠，車軨用白件出模？」

阿寶（Amuro Ray，《機動戰士高達》男主角）

* 另一譯名為阿姆羅．雷，出生於UC 0064年，跟隨父親移民至殖民地Side 7，性格內向、熱愛機械。

* UC 0079年，意外地啟動了聯邦軍的高達，因而成為白色基地（White Base）的成員，捲入與自護軍的「一年戰爭」，啟發了新類型人（New Type）的潛能，與馬沙成為宿敵。

* 在《Z》和《ZZ》故事中，加入反地球聯邦組織卡拉巴（Karaba），繼泰坦斯瓦解和第一次新自護戰爭後重返聯邦軍，UC 0093年成為隆巴納戰隊（Londo Bell）的MS指揮官，參與第二次新自護戰爭，最後與馬沙生死未卜。

製作示範：www.rayhobby.com　

商品查詢：2433 1828（瑞華行）