《MotorStorm 3》炒車撞埋身
因為受到地震影響,不少日本遊戲都要延期推出,以避開呢個敏感時刻,其中包括呢款以地震後美國西岸城市為賽道嘅《MotorStorm 3》,但係香港地區就如期發售。以Game論Game,《MotorStorm 3》確實做得唔錯,而且仲對應埋3D顯示,炒車時真係有種撞埋身嘅感覺!
地震廢墟鬥車
前兩集《MotorStorm》都係以瘋狂嘅越野賽車為題,喺不設遊戲規則嘅賽道上,橫衝直撞鬥快過終點,仲附送大量唔同嘅炒車方法。對應3D顯示嘅《MotorStorm 3》就用上被大地震摧毀嘅美國西岸大城市做背景,整個城市滿目瘡痍,高樓大廈、高速公路都盡毀,雖然對比起之前兩集嘅沙漠、溪谷等場景來得有新鮮感,但呢個時候睇見都幾令人心酸。
立體感強唔眼花
遊戲玩法跟以往一樣,有唔同嘅比鬥方式畀大家揀選外,今集更新增咗Story Mode劇情模式,考驗大家逃生時嘅即時反應。例如喺城市賽道上鬥車時,要跳過高樓之間嘅斷壁,同閃避塌下來嘅建築物已經相當困難,而路面更不時會有障礙物,或者突然出現成棟大廈倒冧嘅場面,一唔小心就會撞到四輪朝天或者飛出車外,尤其係用上3D電視兼戴上3D眼鏡玩時,臨場感更加逼真,但就唔似喺N3DS上玩《Ridge Racer》時咁眼花添!
遊戲檔案
類 型:賽車
開 發:Evolution Studios
平 台:PS3
推出日期:剛推出
售 價:$388
查詢:2341 2356
遊戲速度感做得相當唔錯,如果配埋3D電視就更有臨場感。
城市賽道滿目瘡痍,玩家要喺破爛嘅建築物屋頂上飛來飛去。
遊戲內可以駕駛多款車種,不過下場都係一樣,就係撞到支離破碎。
炒到飛起向來都係《MotorStorm》嘅特色,體驗唔同嘅「炒法」亦係遊戲嘅樂趣之一。