Chat Room

科技版記者Gilbert

年初《青蜂俠》上映，全美票房只得九千幾萬美元，口碑票房全部輸晒，證明「真人+漫畫+電影」，唔係必勝方程式。不過同類作品依然陸續有來，四月先有《Thor》，七月再有《Captain America》，點解突然咁密？全為出年嘅《Avengers》鋪路也！然而，觀乎《Iron Man 2》講多過打，無端用二打六Chris Hemsworth做主角嘅《Thor》，以及造型超懷舊嘅《Captain America》，最後會幾成功？個人就充滿懷疑。值得一提的是，勁好戲嘅Edward Norton已辭演Hulk一角，屆時《Avengers》就剩番Robert Downey一個孭飛，真令人擔心。

科技版記者Boris

小記咁大個仔都係第一次坐直升機，唔知係咪機長技術太好之故，只有離地起飛嗰下有啲Feel，之後整個飛行旅程都極之穩定。喺1,500呎高空上，原本幾十層高嘅大廈都變得像模型一樣，地面上嘅行人更顯得渺小，不過亦係多得呢班「蟻民」，先至能夠建設出咁美麗嘅城市，所以無論我哋工作幾咁卑微都好，小記都相信「天生我材必有用」！

科技版記者marcovaldo

福島核電廠發生意外之時，小記正身處日本另一端─長崎市。大家應該知道長崎在1945年被原子彈摧毀，直接導致二戰結束。來到長崎，原爆資料館不可不去，在這段時期參觀，心情尤其沉重。館內除展出當年的歷史資料及物品外，更提醒我們由1945年美國首次核試後，到目前為止全球已進行過逾二千次核試，圖中地球模型上的每朵黑色蘑菇雲就是曾經進行核試的地方，原來整個地球早已千瘡百孔。但願經過今次事件後，所有核電廠安全規格會提高，各國不再發展核武，否則一日食幾十袋鹽都冇用！