雙龍會靚仔笑容
李小龍用水比喻截拳道：「Be Water, My Friend！」無形、無法，出拳貴乎靈活；做Figure亦一樣，無論邊種形態、方式，只要展現到神韻，就係好作品。Hot Toys盡得真傳，新發表嘅12"李小龍唔再拘泥於爆衫Show肌肉，改以文裝、微笑征服全球龍迷，還有導演櫈及沙灘椅等道具配襯，武神戲外嘅生活，重現人間！
銀幕外的風采
打響頭炮也好，為滿足龍迷也好，金亨彥過檔HT嘅首款作品，係肌肉狀態最巔峰、以DX系列包裝嘅《龍爭虎鬥》。不過靚還靚，考慮到Enterbay早就出過，再靚都係爭啲新鮮感。因此HT第二炮李小龍改用M Icon形式推出，配件係少咗，但改為李小龍嘅日常生活做賣點，夠晒Surprise！
Figure首見笑
「李小龍Figure，造型離唔開佢嗰四套電影，着嘅唔係功夫衫，就係黃色戰衣，其實李小龍Behind the Scene嘅生活、打扮，都有好大嘅發揮空間，特別係微笑表情，更係Figure界未出過。」Hot Toys舵手Howard有感而發，由於金大師曾私下做過大版微笑頭雕，因此今次要縮細到12"，可謂易如反掌，加上有JC.Hong、Yulli分別負責塗色同監督，個人認為頭雕真係冇挑剔餘地，若果真係要雞蛋裏挑骨頭，就係兩個造型獨立發售，但頭雕表情類同，有點取巧之嫌喎！
服裝指導Eric So
相比頭雕，服飾先係難度所在，事關龍哥戲外嘅生活，可供參考嘅素材唔多，因此HT盡量搜集當年嘅訪問相及出埠相外，仲請教埋曾經舉辦李小龍Fashion Show嘅Eric So意見，加埋韓籍裁縫Hai Lim幫助，兩個造型終於順利面世︰一套係經典嘅藍色V領襯衫、灰色喇叭褲配啡白尖頭鞋，牛屎飛打扮，今日睇依然潮爆；另一套係卡其色西裝褸，白恤衫襯橫格呔，一身斯文Look，重現當年與鄒文懷祝酒一幕。兩個造型都送烏蠅鏡同手錶，前者跟埋沙灘椅，後者就送導演櫈，就算面相一樣，睇怕忠實龍迷都係要一Set入齊啦！
查詢︰2388 4677（玩具狂熱）
HT M Icon & Movie Masterpiece Bruce Lee
零 售 價︰各$980 預訂價︰各$950
發售日期︰今年第2季
a.In Suit
b.In Casual Wear
＊圖中為試辦款式，與正式推出的版本或有少許分別。
Casual Wear我都係咁靚仔，服未？（設計對白）
有圖為證，龍哥（右）當年曾以西裝Look，跟鄒文懷祝酒。（黑白圖片）
全部布料輕薄而具彈性，擺李三腳甫士話咁易。
Be Water, My Friend！
西裝褸內有小背心及領帶，貼服到真衫咁款。
當年皮鞋興高踭，HT都注意得到，抵讚！
咖啡白相間尖頭鞋，係昔日嘅至潮打扮。
V領襯衫Show驚人「事業線」，襯埋啡色皮帶同喇叭褲，Yeah爆！
沿用《龍爭虎鬥》時嘅小龍專用Body，全身約有30處可動關節。
Casual Wear送沙灘椅；In Suit就跟導演櫈，兩款都摺得埋，好鬼逼真。
