on.cc 東方互動主頁

PIXMAiX6560 A3靚相2mins速成

影完靚相，除咗可以放上網同朋友分享外，對於一啲自己極鍾愛嘅作品，列印出來裝裱鑑賞也不失為一個好選擇。最近Canon推出一部專為A3相片打印而設嘅PIXMA iX6560，擁有9,600×2,400dpi超高解像度，而且體積輕巧，放喺屋企印靚相就最方便。

5色獨立墨盒

坊間專為相片打印而設嘅機種唔算多，而且要支援到大尺寸相片嘅型號更係少之又少。iX6560選用5色獨立墨水系統，內置咗Canon研發嘅FINE（Full-photolithography Inkjet Nozzle Engineering）噴墨頭，可以噴出大小均一的1微微升墨滴，而且解像度更達9,600×2,400dpi，令相片嘅細緻度同色域大大提升，平時喺屏幕睇唔到嘅變化，都可在相片中重現，觀賞價值自然更高。加上，iX6560同其他PIXMA系列一樣備有自訂相片修正功能，大家可以隨時調校清晰度、對比度同光暗等效果，而且列印A3相片只需兩分鐘，真係快靚正嘅選擇！

打印範本任單撈

iX6560唔止印相靚，佢嘅外形亦都唔錯，採用鋼琴黑簡約盒形設計，體積亦只有549×299×159mm，慳位之餘又不失美觀。另外，iX6560仲支援多種網上服務，包括會為大家自動選購墨盒嘅「Consumable Express」網頁，今次仲加埋專為A3+尺寸而設嘅實用範本可供下載，好似辦公室嘅告示格式、食肆裏面嘅餐單同宣傳海報，又或者產品目錄等，總之款式包羅萬有，方便SOHO或商務應用。