足不出戶 iPhone賞櫻
每年三月底至四月中都係日本賞櫻嘅旺季，不過日前仙台大地震，保安局甚至向日本部分縣市發出黑色旅遊警示，可能會打亂各位嘅賞櫻大計，好在AppStore上都有唔少相關嘅櫻花Apps，無論係賞櫻好去處、靚相圖庫或者小遊戲都一應俱全，足不出戶亦一樣可以欣賞到櫻花之美。
無論親身見過或者只係睇相都好，相信好多朋友同小記一樣，都會為如飄雪般的櫻花美景而着迷，今次介紹嘅iPhone Apps唔止有得睇，部分仲好玩又實用，絕對能幫大家止止癮。
漫天櫻吹雪Sakura Furu Camera
日本人講嘅「櫻吹雪」，即係漫天櫻花飛舞咁解，依家各位大可利用Sakura Furu Camera軟件令美麗嘅「櫻吹雪」重現眼前。透過這款影相App，畫面加入仿如櫻花飄落嘅效果，仲可以按Pose鍵留住靚靚嘅櫻吹雪畫面，然後再進行主相拍攝，就唔怕顧此失彼啦！
費用：US$0.99
櫻花時計Real SnowGlobe Sakura Cherry Blossom
除咗睇靚相外，仲可以透過呢款櫻花時計畀大家望梅止渴。雖然佢主要用途只係一個時鐘，會顯示埋年、月、日同時間資訊，但係畫面中間有一棵櫻花樹，配合日本嘅傳統悠揚音樂，可以增加各位嘅想像空間。
費用：US$0.99
熱點速查iSakura Japan
雖然話呢款iSakura Japan上年已經推出，但係佢唔止有齊各省縣嘅賞櫻熱點、最近天氣同開花情況外，仲分別有電車路線同高速道路路線查詢，仲詳細到加入如夜櫻、泊車同日本酒販賣等唔同分類搜尋，如期出發嘅自助遊必備。
費用：免費
靚相放送Sakura Photobook
櫻花點解可以令到咁多人如此着迷？有時單靠文字未必表達得到，倒不如睇相更直接！Sakura Photobook雖然售價貴咗啲，要成US$1.99先有交易，但相片質素甚高，至今已經出到第二冊，每冊有50張靚相可以畀大家慢慢睇，肯定靚過自己影！
費用：US$1.99
櫻花接不停WhileWaiting
此乃一隻Kill Time App，透過機身Motion Sensor感應來控制公仔行左行右，接住掉落嚟嘅櫻花，至啱等人時用嚟打發時間。遊戲介面似水彩畫，配合可愛嘅公仔賣相，應該吸引到唔少女仔玩，玩完仲可以將櫻花以Email寄畀朋友仔，提醒佢哋唔好成日遲到。
費用：免費
名櫻圖鑑Japanese Sakura Viewing Guide
日本各地都有櫻花睇，除咗大家熟悉嘅東京新宿御苑、上野恩賜公園；大阪嘅大阪城公園同京都嘅清水寺外，仲有邊度有靚櫻花睇呢？呢款程式勝在大部分賞櫻地點都設有相片同解說，仲有三大最有名氣櫻花、最具人氣賞櫻地點、同最受歡迎櫻花群，依家可以先做定功課，遲啲再去睇過！
費用：US$0.99
