QWERTY手機 靚仔好打
近年人人都出篤芒手機，玩Multi Touch夠晒過癮，不過用嚟打SMS或者覆Email就真係受罪。皆因新機多數玩虛擬QWERTY鍵盤，就算部機有4、5吋大芒，都成日按錯隔籬，激氣！要打字打得快而準，最好就係買部有實體QWERTY鍵盤嘅手機。以前啲QWERTY鍵盤手機，多數牛龜咁大部，仲要薯頭薯腦，一啲都唔型；但係新機好似Mo記Milestone 2、HTC Desire Z咁，又薄又靚仔，打字隨時快過用電腦喇！
其實QWERTY鍵盤已經有超過100年歷史，最初應用於打字機上，後來更加入到個人電腦。自從Palm年代開始，實體QWERTY鍵盤開始應用於手機以及Pocket PC等手提設備方面，尤其係採用觸控屏幕的機款，以解決輸入文字不便的問題。近代的QWERTY手機，除了可以輸入英文字外，亦會加入電腦鍵盤常見嘅倉頡、速成、注音、拼音等輸入法，打中文就更加方便。
側滑設計最舒適
市面上有唔少QWERTY手機，主要分為直體式及側滑式。直體式的代表就有Nokia C3、E72等機款，好處係鍵盤外露，可以直接輸入文字，但同時局限咗屏幕尺寸，而且QWERTY鍵盤嘅體積亦相對較細，大大影響打字手感。側滑式嘅代表就有Motorola Milestone、HTC Touch Pro等，鍵盤藏於屏幕下，打側一推將鍵盤滑出，因此機身明顯較大較厚，但鍵盤布局似足電腦，無論手感以及舒適度都較好。
Motorola Milestone 2 微斜好手感
上一代Milestone賣到成行成市，成功為Mo記翻身。嚟到Milestone 2，同樣備有3.7吋芒、側滑式QWERTY，貌似舊酒新瓶，實情係在招牌QWERTY鍵盤上來個大變身。新版鍵盤有三行英文字母，仲要由上而下斜斜哋咁排，似足真實嘅電腦Keyboard，抵讚！而且將上一代嘅十字方向鍵大大縮細，令到字粒變得更大，打字就冇咁易按錯！滑出鍵盤後，大部分功能都可以由鍵盤操作，包括方向、確認、返回等等。不過要留意，只內置拼音輸入法，加上鍵盤又冇印上倉頡碼，未能充分善用QWERTY嘅優勢喎！
HTC Desire Z 易推唔頂手
作為HTC首部QWERTY鍵盤手機，Desire Z放棄傳統嘅側滑式設計，採用獨家設計嘅Z-Slider。只要將部手機輕輕橫推，個芒就會順勢升起呈Z字再降下，呢個設計唔止有型，仲有實際作用。因為將個芒平放喺QWERTY上，打字時冇咁頂手，唔怕按唔到最頂行嘅字粒，而且每個字粒都係獨立成鍵，兼內置多種輸入法，包括倉頡、速成、注音、拼音、筆畫等等。最正係HTC喺QWERTY上加入兩粒快捷鍵，畀用家自訂想開啟嘅程式，覆Email時只要按「R」或「F」就可以回覆同轉寄，非常User-Friendly！
Motorola Flipout 擰出QWERTY
Flipout備有一個2.8吋篤芒，雖然唔算難篤，不過用嚟打字真係自討苦吃。其實只要你用手指頭一擰，個芒就會90度打開，露出芒底嘅QWERTY鍵盤，變成一部直立式QWERTY手機！雖然機仔細細，但鍵盤按鍵有齊倉頡字根之餘，連方向鍵、搜尋鍵都有，而且字粒都唔算逼，男仔用一樣得！不過同Desire Z一樣冇返回鍵；好在內置咗注音、倉頡兩種輸入法，都算夠用。
Nokia E7 座枱睇片
Nokia一向都有出QWERTY手機，不過講到新嘅Symbian^3系統，就真係得番E7一部！E7機能同N8近乎一樣，不過就多咗個QWERTY鍵盤。字粒有齊倉頡字根同筆畫碼，內置倉頡以及簡易倉頡（即係速成）輸入法，絕對夠用，而且所有字粒獨立分開，手感亦都唔錯。最重要係個芒推開後會呈45度角升起，可以座枱睇片，非常貼心！不過E7嘅側滑方式都幾難用，唔算推又唔算揭，搞搞吓仲好易整跌部機，唔熟手嘅朋友記住揸穩！
輸入法免費升呢
買咗個部QWERTY機，先發現只得倉頡輸入法，但自己又淨係識速成，咁咪得物冇所用？唔怕，因為Android Market都有大量輸入法Apps畀各位單撈，唔單止倉頡，就連速成、廣東都有。
《Cangjie Keyboard》似足PC版
《Cangjie Keyboard》就最接近大家用開嘅PC版倉頡，除咗一般拆字外，仲支援符號輸入，只要大家好似PC咁打ZXAB，就會出到逗號，用慣電腦打字嘅朋友好易上手，個App仲會自動幫你記低用過嘅字，將常用字顯示喺選單嘅最前位置，揀字就更加方便啦！
下載：免費
《Simplified Cangjie Keyboard》 易用速成
倉頡拆碼易學難精，好多朋友都改學速成，咁《Simplified Cangjie Key》就幫到你！佢係Android Market入面少見嘅速成輸入法，而且字庫數量都唔少，常用字全部支援。值得一提嘅係，呢隻App同《Cangjie Keyboard》係同廠出品，同樣會記低你嘅常用字，對於成日要揀字嘅速成輸入法尤其有用，必裝！
下載：免費
《CedIME》中英混打
打SMS、Email時少不免夾雜中、英文，但係原生輸入法多數要按一大輪先轉到輸入法，嘥時間！《CedIME》能支援倉頡、速成、筆畫及注音輸入法，大家只要喺Space Bar位置向橫一拉，就可來回轉換中英文輸入法，完全唔使等，啱晒打SMS時喜歡中英夾雜使用嘅朋友。
下載：免費
《HKIME》輸入法大全
如果部手機咁啱咩嘢輸入法都冇嘅話，咁就一定要裝《HKIME》！佢可以話係Android Market入面最齊全嘅輸入法App，唔單止有倉頡、拼音，就連速成、廣東、手寫、筆畫都有齊，可以話係集大成。不過要留意，雖然《HKIME》係免費下載，不過呢個版本只係試用，用嘅時候會彈出廣告，仲有部分手寫功能用唔到。想買完全版就要畀HK$25，有齊咁多種輸入法，價錢都算合理啦！
下載：免費
Nuu MiniKey iP4加料變QWERTY
好多朋友都投訴用篤芒手機打字難，尤其iPhone內置嘅筆畫輸入法又怪，倉頡字粒又難篤，搞到唔可以邊行邊覆SMS。今次介紹嘅MiniKey，係一個專為iPhone 4而設嘅藍芽QWERTY鍵盤，只要將手機同MiniKey配對後，就可以隨時打字。採用側滑式設計嘅MiniKey使用內置電池，只要駁上microUSB就可以充電，夠晒方便。不過，字粒略嫌偏硬，而且又冇倉頡碼，好在合體後可以當埋保護殼，一物兩用！
查詢：（a）2506 3888 （b）3520 1234 （c）2136 6338 （d）www.nuubrand.com
