《人中之龍Of The End》黑幫屍殺爽到爆

描述東洋黑幫故事嘅《人中之龍》系列，主角桐生一馬嘅熱血劇情，為故事創下唔少傳說，風頭之勁可以話係SEGA當年神作《莎木》再版。不過製作人名越稔洋今次就認真大膽，扭橋扭到變成打喪屍，將神室町變成生化戰場，主角等人由拳來腳往，變成子彈橫飛，仲將遊戲名改埋做「Of The End」，即時成為Game壇熱話。

人哋話「好Game爛Game只係一線之差」，扭橋扭得差，分分鐘「神作」都變「雷作」。呢鋪玩到咁大嘅《人中之龍Of The End》，官方一直逐少逐少咁公開遊戲嘅爽快玩法，由最初被人彈到飛起，到依家未開賣都已經有人訂貨，相信唔使多講，都知道新作有幾過癮啦！

歡樂城變喪屍場

故事舞台繼續由亞洲最大嘅歡樂街─東京神室町展開，講述2011年4月突然遭受神秘「殭屍」入侵，連場暴動令神室町變成咗滿街喪屍嘅死城，連自衞隊都起埋條「防線」隔離，幸存嘅居民可謂叫天不應，叫地不聞。喺咁危險嘅情況下，神室町「四子」挺身而出，包括「貴利王」秋山駿、已退隱嘅「關西之龍」鄉田龍司、「獨眼癲狗」真島吾郎，最後當然唔少得大阿哥「堂島之龍」桐生一馬。四個人為各自嘅理念而殺入敵陣，解開種種謎團，展開連場「屍」殺！

亂槍掃射唔使瞄

打喪屍除咗要場面夠壯觀外，使用嘅槍械都要易用兼爽快。今集為咗簡化槍戰射擊戰鬥，採用「Gun Shoot Battle」特色，喺無限子彈嘅情況下，唔使瞄準都可以輕鬆掃射，爽到爆！不過要針對敵人弱點作出致命攻擊時，就要利用「Aiming Mode」瞄準先得。至於角色嘅必殺技「Heat Snipe」就人人唔同，例如桐生用超精密射擊，藉着擊落空中嘅手榴彈來製造「連爆之極」，殺傷力非同小可，而且新增嘅「協力Heat Snipe」更有多種強勁二人合作招式，連路邊嘅推土機、棒球發射器都可以隨手拈來變成可靠武器，非常過癮。

死城都有陪酒妹

聽落都搞笑，雖然神室町已淪為死城，但係各式娛樂場所竟然能夠安然經營！大家就算射到手軟都有地方忙裏偷閒一番。今集收錄嘅夜店「Jewel」同「Shine」，有大量小姐陪大家飲酒作樂，仲可以試吓約佢哋齊齊碌齡篤波，又有棒球、Golf練習場，就連酒吧掟飛鏢、波子機、K房唱歌等亦統統有得玩，加埋「相棒」系統畀大家招攬居民共同作戰，副任務之多，沉迷起上嚟，分分鐘忘記咗主線任務！

遊戲檔案

類　　型： 動作射擊+

冒險

開　　發： SEGA

平　　台： PS3

人　　數： 1人

推出日期： 待定

售　　價： $368

查詢：2620 6667

名越稔洋（著名遊戲製作人）

* 1989年加入SEGA，參加鈴木裕的《Virtual Fighter》3DCG設計，是日本其中一位將3DCG導入電視遊戲的代表人物。

* 1994年首次自己創作遊戲《Daytona USA》，成為史上其中一款最好賣的賽車遊戲。

* 2000年SEGA業務分拆，成為子公司Amusement Vision的代表董事。

* 2004年SEGA重新合併，擔任R&D創作辦公室一員，並創作出《人中之龍》系列。

* 2005年12月《人中之龍》開賣，系列作連同廉價版（The Best版），至今累計已賣出超過300萬套。